٩ نصايح عشان تقدر تنام في الحر

25/06/2020

واحنا على مشارف شهر سابعة، والحر هيبدأ يوصل لذروته، وهنبدأ نعاني من المشكلة السنوية في النوم الهاديء المريح، خصوصًا لاللي مش بيستحملوا يناموا على تكييف أو مروحة مباشرة عليهم، أو اللي بيروحوا رحلات أو معسكرات تخييم، جمعنالكم شوية نصايح إزاي تقدر تنام في ظل حر يوليو وأغسطس، زي ما ذكرهم موقع "Mirror".

1- حاول بقدر الإمكان تخلي أوضتك باردة خلال يوم، يعني مش لازم تفضل فاتحها لضوء الشمس طول اليوم، أو لو فيه موجة حارة يبقى أحسن ما تفتحش الشباك لأنك هتدخل السخونية جوة.

2- تاخد حمام بارد او فاتر قبل النوم، ولو مكسل أو ما تقدرش ممكن بس تدخل دراعك كله تحت الميه الباردة ده حيهدي جسمك.

3- اشرب ميه باستمرار طول اليوم وحافظ على جسمك رطب، احتياج الجسم للميه ممكن يبقى من أسباب صعوبة النوم.

4- البس حاجات خفيفة، طبعًا من المغري إنك ما تلبسش حاجة خالص لو تقدر، لكن الأصح إنك تلبس حاجة خفيفة وفضفاضة، مصنوعة من الألياف الطبيعية، قطن أو كتان، لأنها خامات بتسمح للبشرة تتنفس.

5- ما تلعبش رياضة، ما تفرهدش نفسك عمومًا قبل النوم بوقت صغير، لأن ده هيعلي درجة حرارة جسمك الداخلية، اعمل اللي انت عايزه قبل النوم بفترة كافية عشان تدي جسمك فرصة يهدى.

6- لو ما تقدرش تنام من غير غطا، يبقى خفف الغطا خالص، ممكن تستخدم الملايات في التغطية، ويُفضل القطن مش النايلون، لأن القطة بيمتص العرق.

7- شغل المروحة من غير ما توجهها عليك لأن ده مضر ولو نومك خفيف هيكون كمان مزعج، فممكن تشغلها في اتجاه بعيد عنك.

8- نام لوحدك، سواء بينام جنبك في العادي إنسان أو حيوان مربيه، انفصل عنهم، لأن الجو لما بيكون حر، الحرارة اللي بتطلع من الجسم بتبقى فعلًا كبيرة ومزعجة.

9- شتت نفسك، لو قعدت تفكر في إن الجو حر وإنك مش عارف تنام، هيفضل النوم صعب، حاول تشغل موسيقى، بودكاست، أي حاجة تقدر تسمعها صوت بس وتسرح معاها، من غير ما تبص في شاشة تفوقك أكتر أو تفضل تفكر في إنك حران.

Comments: