٨ حاجات مش هيفهمها غير الشخص الكسول

25/06/2020

الشخص الكسول موجودة في حياتنا كلنا، يا إما صاحبك، حد من أهلك، يا إما هو انت شخصيًا، وفيه سمات كده لحياته وتصرفات يومية نقدر نقول شوية منها في النقط الجاية، على سبيل المثال وليس الحصر!

1- هينده عليك من آخر الدنيا عشان تناوله على الترابيزة اللي قدامه بس هتحتاج إنه يتحرك أو يقوم خطوتين!

2- هيسألك في الرايحة والجاية رايح فين عشان يشوف لو محتاج حاجة من المكان ده تجيبله معاه.

3- ممكن يفكرك ويقنعك بمشوار ناسيه أو مش متحمسله لأنه عايزك تجيبله حاجة وانت جاي.

4- أعصابه حلوة وعنده طاقة يهاتي معاك كتير جدًا عشان يقنعك إنك المفروض انت اللي تقوم أو تعمل مشوار أن إنه عنده مآسي تانية المهم إن هو ما يقومش!

5- أستاذ في الاتفاقات والأحلام والطموحات، على الفسح والمشاوير والسفر، لكن طبعًا وقت التنفيذ هيقولك بالسلامة انت!

6- التسوق أون لاين اتخلق عشانه، والأهم أبلكيشنز طلب الأكل، المهم بس ما يحاولوش يتصلوا بيه عشان هيحس إن ده مجهود وممكن ما يردش!

7- كرييتيف جدًا، دايمًا هتلاقي في حياته أفكار جديدة لحاجات تفتحله النور وتناوله الريموت وتوصله للفيشة وتخلي الناس تجيبله حاجته من غير ما يقوم، لنا في "فريندز" خير مثال لما "جوي" كان بيدي بتوع الدليفري رقم شقة "مونيكا" عشان تستلم هي الأكل وتلاقيه مش بتاعها فتجيبه من غير ما يقوم من على الكرسي!

8- لو طلبت منه حاجة وهو في السكة لكن هي مش في خط سيره فانت بتكدره جامد أوي!

Comments: