إزاي تختار النضارة الشمس المناسبة لشكل وشك!

25/06/2020

النضارة الشمس في خروجات الصيف بتبقى من الأساسيات مش لمجرد إنها هتخلي شكلك حلو أو هتداري عنيكي لو مش حاطة "ميك أب" خصوصا لو إنها بتحمي العين من أشعة الشمس الضارة وبتقلل من التعب اللي ممكن نحس به نتيجة للشمس.

وبما إن يوم 27 يونيو هو يوم النضارات الشمس، خلينا نقولك إزاي تختار النضارة الشمس المناسب لوشك، ولكن الأول اعرف إزاي تعرف شكل وشك وهو عن طريق إنك هتجيب حاجة من الحاجات دي قلم "ماركر" قابل للغسل أو روج أو قطعة صابون أو قلم رصاص، واقف قدام المرايا، وحاول تحدد مخطط وشك على سطح المرايا من أول دقنك لحد شعرك، وخد خطوة ابعد لورا وشوف الناتج هيطلع شكل إيه.. وعلى أساسه اختار نوع نضارتك زي ما قال موقع "brightside":

1- لو وشك مدور:

لو وشك مدور فمهمتك هي إنك تخلي وشك شكله أطول شوية فلو اختارت نضارة إطارها داكن هتضيق شكل وشك وتخلي وشك يبقى أقرب للشكل البيضاوي، وعشان تخلي وشك متوازن اختار إطار نضارة يكون فيه العرض أكبر من الارتفاع.

النضارات المناسبة للوش المدور:

1- النضارات المستطيلة والمدببة 

2- نضارات الـ "Cat eye"

3- نضارات الفراشة 

4- نضارات الـ "Wayfarers" 

5- نضارات الري بان خصوصا الـ "Aviators"

2- لو وشك بيضاوي:

من أهم النصايح في اختيارات نضارات شمس للوش البيضاوي هي إنك تتجنب اختيار النضارات الضخمة، ويفضل لنضارة تبقى على قد وشك أو أوسع حاجة بسيطة واتأكد إن الجزء العلوي من إطار النضارة مش أعلى من حواجبك.

النضارات المناسبة للوش البيضاوي:

1- النضارات اللي إطاراتها مستطيلة وبيضاوية ومستدير 

2-  نضارات الفراشة 

3-  نضارات الـ "Wayfarers" 

4- نضارات الري بان خصوصا الـ "Aviators"

3- لو وشك مربع:

النضارات اللي إطاراتها مربعة أو مستطيلة بزاوية حادة ممكن تزود حدة وشك، لكن النضارات اللي إطاراتها مستديرة بتحقق التوازن.

النضارات المناسبة للوش المربعة:

1- نضارات كبيرة

2- النضارات اللي عرض الإطار فيها بيساوي عرض الوش 

3- نضارات بإطارات ملونة 

4- النضارات اللي من غير إطار 

5-  نضارات الـ "Wayfarers" 

6- نضارات الري بان خصوصا الـ "Aviators"

4- لو وشك مستطيل:

النضارة المناسبة هي اللي هتخلي وشك يبان كأنه أعرض عشان كده اختار النضارات اللي الكبيرة أو الضخمة.

النضارات المناسبة للوش المستطيل:

1- نضارات بإطارات ضخمة 

2-  نضارات الري بان خصوصا الـ "Aviators" الكبيرة 

3- النضارات اللي إطارها دائري

5- لو وشك على شكل قلب:

هدف النضارة هي إنها تخلي نص وشك اللي تحت يبقى شكله أكبر في الحجم، وطبعا النضارات الضخمة أكيد مش هتساعد في ده، وحاول تخلي عرض النضارة بيساوي عرض وشك، النضارات اللي على شكل دمعة هتفضل ليك.

النضارات المناسبة للوش على شكل قلب:

1- نضارات مدورة 

2- نضارات دراعتها نازلة لتحت

3- النضارات اللي من غير إطار 

4- نضارات ألوانها محايدة أو فاتحة.

6- لو وشك مثلث:

لو وشك مثلث اختار النضارات اللي إطارها كبير وتبقى عريضة من فوق ولكن الجزء اللي تحت منها مش لازم يبقى مربع أو حاد.

النضارات المناسبة للوش المثلث:

1- نضارات مدورة من غير ما تبقى إطارها ملون 

2-  نضارات الري بان خصوصا الـ "Aviators"

3- النضارات اللي من غير إطار 

4-  نضارات الـ "Cat eye"

Comments: