ليه العلاقات بتبقى أصعب على الأشخاص اللي بيعانوا من الـ "Overthinking"!

01/07/2020

العلاقات عموما شئ صعب ويمكن أصعب جزء في حياة الناس، بس لو ضيفت لها بقى القلق أو التفكير الزيادة عن اللزوم سواء في العلاقة أو تفكير الشخص في نفسه وفي صورته في العلاقة، ولحظات الشك والجدال والمشاكل اللي بتكبر في حين إنها ممكن ماتبقاش مشاكل أصلا.

ويمكن التفكير الزيادة أو الـ "Overthinking" بيدمر علاقات كتير، لكن الناس اللي بتعاني من القلق بتبقى عارفة إن دي صفة فيها وبيبقى نفسهم يقابلوا حد يفهم العيب ده ويحتويهم ويلاقي حل معاهم له.

ولكن لإن مش العقل هو اللي بيختار الشريك المناسب لعلاقتنا وقلبك ومشاعرك هما اللي بيختاروا فخلينا نقولك شوية حاجات لازم تحطها في اعتبارك لو دخلت علاقة مع شخص بيعاني من الـ "Overthinking" حسب موقع "thought nova":

1- طمنهم دايما إن مفيش حاجة تستدعى القلق:

مش لازم تركز على حقيقة وحجم المشكلة من منظورك إنت، وحاول على قد ما تقدر تطمنهم إن كل حاجة كويسة وإنك هتهتم بيه، لإن في الواقع ده بيهديهم أكتر من إنك تنزعج أو تختفي وتسبهم، والحاجة الكويسة إنك مش مضطر دايما تعمل كده، لما ثقتهم فيك هتكبر و يطمنوا إنك مختلف عن الأشخاص اللي مروا معاهم بتجارب سيئة قبل كده الموضوع هيبقى أسهل، ولكن أهم حاجة اصبر.

2- ساعدهم يتخاطوا مخاوهم:

مفيش حد طبعا قادر يصلح كل حاجة، ولكن لما شريكك يبدأ في التفكير بشكل مبالغ فيه كل اللي عليك إن تقدم له دعم بأي طريقة إنت شايفها، لإن طول ما هما مش حاسين بالوحدة وعارفين إن فيه حد جنبهم فهما بخير.

3- خليك عارف إن عقلهم بيلعب عليهم:

توقع إن كل حاجة بتقولها أو بتعملها بتكون تحت الملاحظة، ممكن تلاقيهم بيحللوا نبرة صوتك لو اتغيرت أو كل كلمة قولتلها، وممكن من التفاصيل الصغيرة دي يفتكروا إن فيه مشكلة كبيرة جايه في الطريق، وده لإنهم بيتوقعوا كل الاحتمالات السيئة، وخلي بالك هما مابيعملوش كده وهما قاصدين، بيعملوا كده عشان عقلهم قادر يسيطر على تفكيرهم بحيل خارج إرادتهم.

4- خلى إجاباتك مباشرة:

يمكن أغلب الوقت الأشخاص اللي بيعانوا من الـ "Overthinking" بيسألوا كتير عشان يتأكدوا، ويمكن الغلطة مابتكونش فيهم وبتكون في الأشخاص اللي كانوا في ماضيهم خلوهم يشكوا في نفسهم، وعشان الموضوع يبقى أسهل لازم تقولهم إجابات مباشرة على أسئلتهم.

5- قدم لهم حب غير مشروط:

الأشخاص اللي بيعانوا من الـ "Overthinking" بيبقوا مدركين كويس إيه القصور اللي في شخصيتهم، ومابيحبوش الجزء اللي دايما قلقان في شخصيتهم، عشان كده لازم تقدم لهم حب غير مشروط عشان يحسوا إنهم يستاهلوا الحب بغض النظر عن أي حاجة، لإن حبهم حقيقى، وبيحبوا يبينوا اهتمامهم وحبهم لشريكهم، وبيهتموا بالتفاصيل الصغيرة اللي بيتجاهلها الأشخاص مع مرور الوقت في العلاقة.

Comments: