نصايح وتوضيحات الكهربا للاستهلاك: عشان ما تتفاجئش بالفاتورة الجديدة

02/07/2020

من المقرر إن يتم تفعيل حساب فاتورة الكهربا طبقًا للزيادات الجديد من بداية شهر يوليو، واللي تم الإعلان عنها في مطلع الشهر اللي فات، وكانت الزيادة حوالي 19.1% تقريبًا 76.7 قرش، هيتم المحاسبة عليهم بداية من فاتورة أغسطس عن الشهر الحالي.

وفي مداخلة هاتفية في برنامج "صالة التحرير" مع الإعلامية عزة مصطفى، قدم الدكتور أيمن حمزة، المتحدث الرسمي باسم وزارة الكهربا، بعض النصايح والتوضيحات لترشيد الاستهلاك "عشان ما تتفاجئش لما الفاتورة تيجي" وهما:

1- ترشيد استهلاك التكييفات بظبطه مثلًا على درجة حرارة أكتر من 25 أو 24 بحد أدنى.

2- الاهتمام بالصيانة الدورية للتكييفات.

3- الحرص في استخدام الغلاية الكهربائية، يعني تملاها على قد استخدامك بس، ولو في إمكانية لاستخدام البوتجاز يبقى أفضل!

4- سخان الكهربا ما اسيبهوش في الفيشة طول الوقت يبرد ويسخن باستمرار، الأفضل احط الفيشة بس قبل ما احتاجه بنص ساعة مثلًا.

5- البرامج الخاصة بالغسالات "الفل أوتوماتيك" مفيش لزوم لاستخدام البرامج اللي تسخينها عالي جدًا.

6- تجنب استخدام الميكرويف كتير، ونفس الشيء زي الغلاية لو ممكن استبدله بالغاز يبقى أفضل.

7- تجنب استخدام التكييفات على درجة حرارة منخفضة جدًا خلال درجات الحرارة العالية جدًا.

8- تجنب ترك الأجهزة في الفيشة طالما مش بستخدمها.

9- استخدام أجهزة ذات كفاءة طاقة عالية.

10- ترك مسافة تهوية بين التلاجة والحيطة حوالي 15 سم.

من ناحية تانية وضح الدكتور أيمن حمزة إن استخدام أكتر من تكييف في البيت بيطلعك خارج الدعم، بجانب شريحتين بيتم محاسبتهم خارج الدعم وهما الفئة اللي بتستهلك أعلى من 650 كيلو وات، هيتم محاسبتها على الكيلو الواحد بـ1.18 جنيه، والتانية بتستهلك أعلى من 1000 كيلو وات، هيتم محاسبتها على الكيلو وات بـ1.45 جنيه.

Comments: