القصة الكاملة لهاشتاج "المتحرش أحمد بسام زكي".. والمجلس القومي للمرأة يصدر بيان

02/07/2020

أصدر المجلس القومي للمرأة بيان على الصفحة الرسمية بتاعته على الفيسبوك وقال "يتابع المجلس القومي للمرأة برئاسة الدكتورة مايا مرسى عن كثب وباهتمام شديد الموضوع المثار حالياً على موقع التواصل الإجتماعي (انستجرام)، حيث قامت مجموعة من الفتيات منذ بضعة أيام بإنشاء جروب على موقع انستجرام لتجميع أدلة اتهام ضد شاب، يتضمن سرد شهادات الفتيات على وقائع اغتصاب عديدة قام بها الشاب، ووقائع تحرش جنسى بالفتيات، فضلاً عن رسائل نصية وصوتية خادشة للحياء قام الشاب بإرسالها إلى العديد من الفتيات، وقد حقق الجروب متابعة عدداً كبيراً من الفتيات منذ إنشائه حتى وصل إلى الآلاف من المتابعين .

هذا ويؤكد المجلس القومي للمرأة متابعته لهذا الموضوع، ويهيب بالجهات المعنية للنظر والتحقيق فى هذا الموضوع واتخاذ الإجراءات اللازمة.

كما يطالب المجلس جميع الفتيات بالتقدم ببلاغ رسمى ضد هذا الشاب حتى ينال عقابه الذى يستحق طبقا للقانون، ويكون عبرة لكل من تسول له نفسه المساس بالفتيات والتحرش بهن.

هذا أول بيان يصدرة المجلس بشأن هذا الموضوع، وسوف يصدر المجلس بيانات أخرى لمتابعته."

وبدأت القصة اللي أشار ليها المجلس القومي للمرأة في البيان عن طريق انتشار "ثريد" يوم الأربعاء 1 يوليو لبنت على تويتر بتحذر فيه من متحرش بتقول إن اسمه "أحمد بسام زكي" وقالت القصة وهي:

في 2018 فيه بنت قالت على جروب الفيسبوك بتاع الجامعة الأميركية إن أحمد بسام زكي اتحرش بيها هي واتنين من صاحبتها، وفيه أكتر من 50 بنت اتصدموا وقالوا إنهم مروا بتجارب مشابهة معاه، بعدها أحمد رد وقال إنه كان بيعاني من مشاكل نفسية وهدد إنه هينتحر في الجامعة لو البنات مابطلوش يقولوا عليه كده وبعد كده حول لجامعة تانية في أسبانيا.

وفي نفس الـ"ثريد" كان فيه صورة تانية لبنت بتحكي فيها إن اتبعت لصديقها حكايات من بنات تانية أكتر وأكتر بتحكي إنه تحرش بيهم، والأعتداء وصل لحد الاغتصاب وكان فيه واحدة من البنات دي طفلة وعندها 14 سنة واتعرضت لمحاولات اعتداء وتحرش ورسائل تهديد لإجبارها على علاقة جنسية وقالت في آخر كلامها إن دي رسالة تحذيرية لإنه شخص غير سوي بيساعد صحابه على شرب المخدرات والاعتداء على بنات.

وكان فيه رسايل تانية شاركوا بيها البنات اللي اتعرضوا للتحرش من نفس الشخص ومنهم إللي طاردها وهددها إنها لو ماسمعتش كلامه هيقول لأهلها إن فيه بينهم علاقة وماكنش فيه حاجة، وقالت واحدة تانية إنه كان بيهددها عشان تخضع لمطالبه الجنسية، وقالت بنت كمان إنه هددها بنفس الطريقة وقالها إنها لو مانفذتش طلباته هينشر عنها إشاعات وهيقول إن بينهم علاقة وده ماحصلش.

وقال اكونت انستجرام "Reporting AHMED BASSEM ZAKI" وهو الأكونت اللي بينشر القضية وحكايات البنات في "ستوري" إنه اعتدى جنسياً على أكتر من 100 بنت وإن فيه أكتر من 100 بنت عندهم رسايل مختلفة في الـ"دي إم"، وقال في نفس الستوري إن الجامعة بتاعته في برشلونة رفدته بعد ما البنات اللي في الجامعة بعتوا رسايل للجامعة بيحكوا فيها عن وقائع التحرش اللي حصلت معاهم، وبعتلهم كمان رسايل و"سكرين شوتس" من رسايل البنات في القاهرة.


 

Comments: