مبادرة على "تويتر" لفضح حالات التحرش بالرجال

06/07/2020

في ظل التوتر الحالي المتعلق بقضايا التحرش والاغتصاب، ظهر وجه جديد لأول مرة يتم تناوله بجرأة ووضوح وهو التحرش بالرجال، وده شيء ماكانش حد بيطرحه نظرًا للأفكار المجتمعية إن ده هيقلل من رجولة صاحب القصة ويبوظ سمعته!

بدأت المبادرة على موقع التواصل الاجتماعي "تويتر" بـ كريم جودة، أحد مستخدمي الموقع، اللي بدأ يحكي قصة شخصية حصلت معاه، ودعى بقية الناس إن هما كمان يحكوا قصص مشابهة مروا بيها وقال:

"أتمنى من أي راجل ربنا نجاه من أي محاولة تحرش/ اغتصاب يتكلم في الموضوع. وأنا مش بقول كده عشان أتنشن لأ ده وقته والقضية شغالة. الناس لازم تتخطى الـ Truma دي وتتكلم. أنا الحمدلله كويس بس حبيت اتكلم، ممكن أي حد اتعرض لحاجة وخايف على "رجولته" لا ما تخافش، انت راجل وزيادة كمان وكلنا جنب بعض."

القضية المقصودة، هي قضية طال متهم بالتحرش بعدد كبير من بنات الجامعة الأمريكية، وظهرت في صددها حالات لشباب كمان بيقولوا إنه حاول التحرش بيها.

 المبادرة لاقت دعم من ناس كتير، وبردو لاقت سخرية من بعض الناس، لكن على جانب تاني فيه ناس ما اكتفتش بالدعم لكن كمان استجابت وبدأت تحكي قصصها، وناس بدأت تبعت لصاحب المبادرة قصصهم بدون أسماء.

القصص بتشمل مرحلة عمرية مختلفة، فيه ناس بتحكي حاجات حصلت في طفولتهم فضل لها تأثير عليهم لأنهم ما قدروش يحكوها، وناس بتحكي إن ده حصل معاهم وهما كبار لحد دلوقتي، وزي ما بتكون فيه ردود أفعال عنيفة بيكون فيه توتر واستغراب وخوف خصوصًا لو في سن صغير.

Comments: