المجلس القومي للمرأة تلقى 400 شكوى عن العنف ضد المرأة في 5 أيام 

07/07/2020

أعلن مكتب شكاوى المجلس القومي للمرأة إنه تلقى 400 شكوى واستفسار في 5 أيام في الفترة بين 1 لـ 5 يوليو والشكاوى والاستفسارات متنوعين وأغلبها عن العنف ضد المرأة، وده كان بعد ما تم إثارة قضية تحرش شاب الجامعة الأمريكية على السوشيال ميديا في الأسبوع اللي فات.

وقال المجلس القومي للمرأة إنه هيقدم وسائل الدعم والمساندة القانونية للبنات اللي اتأذوا من شاب الجامعة الأمريكية وتم التحرش بيهم أو لأي ست اتعرضت لأي شكل من أشكال العنف وده من خلال أرقام مكتب الشكاوى، وأكد المجلس القومي للمرأة في الإعلان ده إن أي بلاغ أو استفسار هيتلقاهم المكتب من البنات أو الضحايا هيكون كل بياناتهم ومعلوماتهم في سرية تامة.

وأكدت مديرة مكتب شكاوى المرأة الأستاذة أمل عبد العظيم إن المجلس بيقدم كل أشكال الدعم والمساندة للضحايا والسيدات سواء كانت مساندة قانونية أو نفسية، ده غير إن مكتب الشكاوي بيرد على كل الأسئلة والاستفسارات الخاصة بقضايا المرأة عموما زي الأحوال الشخصية أو العنف ضد المرأة بأشكاله المختلفة، ده غير إنه بيجاوب على شكاوي العمل واستفسارات الضمان الاجتماعي.

وطلبت الأستاذة أمل عبد العظيم مديرة مكتب شكاوى المرأة من البنات اللي تعرضوا لأي شكل من أشكال العنف إنهم يقدموا بلاغات لمكتب النائب العام ومايخافوش ولا يترددوا في الكلام عن المشكلة اللي اتعرضوا لها عشان المجرم والجاني عليهم ياخد جزاءه ويتعاقب وفقاً للقانون، ويبقى عبرة لأي حد ممكن يضر بنات تانية، وأكدت على إن المجلس القومي للمرأة هيقدم كل سبل الدعم للبنات دي.

والجدير بالذكر مكتب الشكاوى للمجلس القومي للمرأة بيتلقي الشكاوي والاستفسارات كل يوم من الساعة 9 الصبح للساعة 9 مساءاً على الخط الساخن ورقمه هو 15115، أو من خلال تطبيق الواتساب عن طريق رقم "01007525600" أو برضه من خلال الصفحة الرسمية للمجلس القومي للمرأة على الفيسبوك أو عن طريق الإيميل الخاص بالمكتب.


 

Comments: