١٣ حاجة مش هيفهمها غير الأشخاص اللي مابيحبوش القهوة 

19/07/2020

اختلاف الأذواق في الأكل والشرب حقيقة كلنا عارفينها بس اللي أغلبنا مش عارفة إنها حاجة بترجع للجينات الوراثية اللي عند كل شخص، وده اللي بيخلي ناس كتير تكتب على السوشيال ميديا Unpopular opinion  إنها مابتحبش المكرونة البشاميل مثلا أو مابتحبش القهوة في حين إن فيه أشخاص تانية ممكن تشتمهم عشان رأيهم الغير شائع ده لإنه بالنسبة لهم غير منطقي.

بس اكتشفت الأبحاث والدراسات إن مسألة تفضيل الأكل والشرب راجعه للجينات الوراثية في جسم الشخص ومالهاش علاقة بذوقه بس، فيه دراسة اتنشرت في أغسطس 2016 اشتغل فيها الباحثين على الحمض النووي للأشخاص المتعلق بالتذوق، ولقوا إن فيه جين اسمه "PDSS2" مسؤول عن تحديد طعم القهوة والكافين بشكل مختلف بالنسبة للأشخاص، واتعملت الدراسة دي عن طريق مقارنة الباحثين الجينات ومقدار الكافيين اللي بيتناولوا شخصين من اللي بيتم الدراسة عليهم واحد من حوالي 1200 شخص في إيطاليا، وواحد من حوالي 1700 شخص في هولندا.

ولكن بما إن السايد بشكل أكبر هو إن الناس بتحب القهوة، فخلينا نعمل رابطة اللي مابيحبوش القهوة ونقولك 13 حاجة مش هيفهمها غير الناس اللي مابيحبوش القهوة:

1- كفاية عليك المنبه وغسيل وشك عشان يصحوا مش محتاج تفوق بعد ما تشرب فنطاس قهوة عشان الكافيين يفوقك.

2- وجبة الفطار عندك بتبقى عبارة عن أكل وممكن أي عصير أو شاي جنبها بس مابتاخدش قهوة على الريق.

3- كل الـ"منيوز" اللي مكتوب فيها قهوة بالنسبة للي مابيحبش القهوة يا مش مفهوم معناها أو تفاصيل اللي جواها أو هتبقى مربكة وخصوصا إن فيه اختيارات كتير ومش معروف إيه الفرق بين الأحجام بتاعة القهوة!

4- مش عارف ليه ممكن حد يصرف اللي وراه واللي قدامه عشان ماكينة قهوة أو عشان يشتروا مشروب بني في حين إن ممكن يجيبوا بالفلوس دي أكل أحلى وينغنغ نفسه.

5- ومش مفهوم بالنسبة لك برضه ليه ممكن حد يصرف الفلوس دي كلها عشان مشروب ممكن يفوقه!

6- مايعرفش يعني إيه "ديت" أو خروجة ممكن يشرب فيها قهوة مع حد بس ويروحوا!

7- ولو حد طلب منه ينزل عشان يشربوا قهوة بياخد وقت طويل عشان يشرح إنه مابيحبش القهوة وليه مابيحبهاش ده غير إنهم بيعتبروا شخص غريب وبيستغربوا جدا من بقائه في الحياة لسه.

8- لما بتقعد في أي مكان وكل اللي حواليك بيطلبوا قهوة وإنت بتطلب شاي أخضر أو شاي بلبن وتحس إن الـ"وايتر" هيجيبلك لعبة هدية مع المشروب.

9- ريحة القهوة بتقلبلك بطنك وبتحسها ريحة حاجة قديمة ومحروقة وعمرك ما فهمت يعني إيه الناس بتشمها بكل حب كده!

10- مابتطقش ريحة نفس حد تبقى قهوة وماينفعش تكلمه وإنت قريب منه 

11- بتحاول مع نفسك كل فترة عشان تبقى بني أدم زي اللي حواليك وبتجرب القهوة ومابتعرفش تقاوم وبعد كده بتندم مع أول بوق وبترميها على طول وبتحرم لفترة وبعدين بترجع تجربها تاني.

12- عمرك ما حسيت يعني إيه إنت متوتر أو مصدع عشان ماشربتش قهوة النهاردة.

13- معداش عليك قبل كده رمضان وحسيت إن أول أسبوع منه عذاب وكل الناس اللي حواليك بتبقى مستغربة إنت إزاي فايق كده الصبح! 

Comments: