روبن ويليامز كـ ملك لمسرح الستاند أب كوميدي.. وقايمة بأقوى استعراضاته

20/07/2020

كتب: كابتن بسلة

في 11 أغسطس سنة 2014 فقد العالم واحد من عباقرة الكوميديا في التاريخ، رحل عننا "روبن ويليامز" وساب معانا ذكريات حلوة كتير وحزن كبير على فراقه كل ما نفتكر لحظة موته أو نشوفه في أي من أعماله الجميلة اللي كبر عليها جيل بحاله.

في 21 يوليو ولد "روبن ويليامز" وفي الذكرى دي قررنا نحتفل به بطريقة مختلفة، فبجانب عبقريته في السينما والتليفزيون وأي عمل شارك فيه إلا إن روبن ويليامز كان عبقري في فن الستاند أب كوميدي، وكان عنده القدرة إنه يوقف أكتر من ساعة ونص على خشبة المسرح يلقي بالنكات العبقرية والذكية بدون توقف وبطاقة وحيوية كبيرة جدًا.

عشان كدة في الموضوع ده هنرشح لكل مُحب للفنان الكبير جانب آخر من شخصيته الجميلة على المسرح بمجموعة من سهرات الستاند أب كوميدي المتاحة على يوتيوب أو من الفقرات اللي كان بيأديها في لقاءاته التليفزيونية أو الحفلات وقدرته المبهرة على الارتجال والإبداع، نتمنى تستمتعوا بيها وهي كالآتي في القايمة دي:

1- Robin Williams: An Evening at the Met

وهي سهرة ستاند كوميدي عملها سنة 1986 في دار أوبرا ميتروبليتان بمدينة نيويورك ومدتها تقريبًا ساعة من الضحك المتواصل والهيبرة المعهودة لروبن ويليامز في شبابه

2- Robin Williams Live on Broadway 

وهي سهرة ستاند أب كوميدي سنة 2002 في مسرح برودواي في مدينة نيويورك ومدتها ساعة ونص تقريبًا

3- An Evening with Robin Williams

ودي سهرة في مدينة سان فرانسيسكو سنة 1983 في مسرح Great American Music Hall

4- Robin Williams at We Are Most Amused

وهنا روبن ويليامز بيغزو الإنجليز في عقر دارهم وبيستضيفوه عشان يقدم فقرة ستاند أب قصيرة في السهرة البريطانية الشهيرة We Are Most Amused.

5- American Idol

وهنا روبن ويليامز قدم فقرة كضيف مفاجىء لبرنامج American Idol  الشهير وكان عامل فيها متسابق روسي!

6- تكريم ألباتشينو  وروبرت دي نيرو

في واحدة من أشهر فقراته على الإطلاق هو ظهوره المميز في حفل AFI Life Achievement Award  لتكريم مسيرة "ألباتشينو" الفنية  ومرة تانية في تكريم "ربورت دي نيرو" ودي كانت النتيجة...

7- جنونه في اللقاءات التليفزيونية

ودي تجميعة لطيفة للحظات له في الأنترفيوز اللي كانت بتتعمل معاه وإزاي كانت دايمًا بتبقى لقاءات مميزة جدًا

وده نقطة في بحر من نتائج بحث كتير هتطلعلك لو دخلت على يوتيوب ودورت على مواقف ومقاطع له خارج عالم السينما والدراما.

 نتمنى مشاهدة سعيدة بالترشيحات دي... 

Comments: