١١ معلومة ماتعرفهاش عن المانجا في يومها العالمي

22/07/2020

مفيش حاجة ممكن تخلي الشخص يستحمل الصيف وخصوصا شهر يوليو وأغسطس قد المانجة، بغض النظر عن المهازل اللي بتحصل في أكلها و"اللغوصة" إلا إنها من ألذ الفواكة اللي بتظهر في الصيف وبنستناها من السنة للسنة.

يوم 22 يوليو هو اليوم العالمي للمانجا.. خلينا نقولك في يوم المانجة 12 معلومة ماتعرفهاش عن المانجة:

1- المانجا هي فاكهة قديمة بيرجع تاريخها لـ 4000 سنة.

2- فيه أكتر من 500 نوع مانجا بيتزرعوا في العالم كله ومعظمها بيبقى في الصيف وبالرغم من اختلاف أشكالها وأحجامها وألوانها إلا إن كلها جواها النوة الكبيرة اللي بيصعب فكها بسهولة.

3- الفيتامين اللي موجود في المانجة بيختلف على حسب نوع المانجا ونضجها، في حين إن المانجا الخضرا بتحتوى على فيتامين C إلا إن المانجة المستوية بتحتوي على فيتامين A 

4- المانجا هي فاكهة وطنية لـ 3 بلاد وهما الهند والفيلبين وباكستان

5- أقدم أشجار المانجا موجودة في "خانديش" في الهند وعمرها 300 سنة ولسه بتنتج مانجا قابلة للأكل.

6- وبالرغم من وجود مئات الأصناف من المانجا في العالم إلا إن فيه 6 أصناف بس في الولايات المتحدة.

7- المانجا هي الفاكهة الأشهر في العالم ومصدرها كان الهند ولفيت بعد كده في آسيا وأفريقيا وأمريكا وبتدخل في صناعات كتير زي العصاير والصلصات والعصاير "السموزي".

8- في القرن الـ 16 كانت أول مرة يتم فيها تخليل المانجا ومن وقتها فيه مانجة مخللة.

9- المانجا لما بتتحط في التلاجة مابتستويش، فلو المانجا اللي جبتها خضرا وحطيتها في التلاجة على أمل تستوي فمش هيحصل لإنها مابتنضجش في درجات الحرارة الباردة، عشان كده حطها في كيس وسيبها في درجة حرارة الأوضة.

10- المانجا حلوة جدا للبشرة لإن المانجة بتحتوي على فيتامين " بيتا كاروتين" اللي فيه فيتامين A اللي بيعالج أغلب مشاكل البشرة وبيخليها تبقى أفتح.

11- وفقا لجامعة "ولاية بنسلفانيا" فالمانجا بتتكون من 83% من المياه، وده اللي بيخليك تحس بالشبع بعد ما تاكلها فترة أكبر لإنها بتحتوي على مياه أكتر.

Comments: