إزاي عطستك ممكن تعبر عن شخصيتك!

23/07/2020

كل شخص له طريقته المختلفة اللي بيعطس بيها واللي مهما كانت هي إيه الناس بيتريقوا عليها برضه، وبما إننا في زمن الكورونا فمهم جدا إننا نفتكر نبعد عن بعض وإحنا بنعطس أو يبقى فيه تباعد عموما ونعطس وكوعنا على بوقنا مش إيدنا وبلاش تعطس في الهوا كده من غير ما تغطي بوفك ومناخيرك بمنديل أو كوعك، بما إننا بنركز أوي كمان في زمن الكورونا مع أي حد بيعطس عشان بنخاف منه، فخلينا نقولك ممكن تستغل التركيز ده إزاي تعرف شخصية اللي قدامك أكتر من طريقته في العطس وفقا لـ "روبن كيرمود" مدرب تواصل ومؤسس شركة "Zone2" لاستشارات التواصل:

1- اللي بيعطس من غير صوت:

"روبن كيرمود" بيعتقد إن النوع ده من الأشخاص بيبقى مش عايز يلفت الانتباه له خالص وهو بيعطس، عشان كده ممكن يبقى شخصية خجولة أو بيفتقر الثقة بالنفس، وممكن يبقوا مابيحبوش يزعجوا اللي حواليهم، ولكن بيحبوا رأيهم يبقى مسموع أكتر.

2- اللي بيعطس كتير ورا بعض:

بيقول "روبن كيرمود" إن النوع ده من الأشخاص هما اللي بيحبوا يجذبوا الانتباه، وقال مثال إن كان عنده عم بيحب يعطس بصوت عالى مرتين ورا بعض الفرق بين كل مرة 11 ثانية كأنه فخور إنه بيعطس عطسة تانية، ولكن فيه ناس كتير بتعطس عطس ورا بعض مرتين أو 3 أو 5 بس مش شرط يبقى صوتهم عالي فيهم.

3- اللي بيعطس ويتأسف:

النوع ده من الأشخاص مابيحبش يدخل في حياة اللي حواليه ولا يأثر فيها وإلى حد ما شخص كتوم ومؤدب على حد قول "روبن كيرمود" وبكل سهولة ممكن تشوفهم وهما بيتعذبوا وباين على وشهم العذاب عشان بس مش عايزين العطسة تطلع وتبان، وطبعا لما ده بيحصل وبيعطسوا بيحاولوا يحتفظوا بمعظم الصوت لنفسهم وجواهم ولكن النوع ده من الناس لازم يشتغل على ثقته بنفسه.

4- اللي بيعطس بصوت عالي:

عدد كبير من الأشخاص اللي بتعطس بصوت عالي مش كلهم ممكن يبقى مابيغطيش بوقة وهو بيعطس لإنهم بيبقوا فخورين بعطستهم، "روبن كيرمود" بيقول خلي بالك منهم عشان غالبا بيبقى أشخاص خطر، وعلى قد صوت عطستهم على قد ما هما متهورين.

5- اللي بيعطس "هاتشو":

الشخصية دي بتبقى الشخصية اللي حاسه إن ليها حق في العطس ولكن بيحاول يكون مؤدب عشان صورته قدام الناس والمجتمع، "روبن كيرمود" شايف إن الشخص ده غالبا شخص واثق من نفسه لكنه شخص واعي وبيعرف يسيطر على نفسه، وممكن يعمل أي حلجة وهو حاسس بحرية ومستمتع بنفسه.

6- اللي بيمسك العطسة:

النوع ده من الناس هما اللي بيبقى مش عايزين يعملوا لقطة أو يعملوا دوشة ويخلوا الناس تركز معاهم، "روبن كيرمود" بيقول إنها حاجة جميلة إنك تحاول تحافظ للناس على سعادتهم وهدوءهم لكن الأشخاص دي كمان صادقة مع نفسها ومابتتأثرش بحد بسهولة.

Comments: