بعد ارتفاع عدد الإصابات في إسبانيا: قلق من موجة تانية لفيروس كورونا

26/07/2020

بعد أقل من شهر من رفع إسبانيا للإجراءات الاستثنائية والغلق بسبب فيروس كورونا، رجع تانى في في بعض المدن زي برشلونة ومدريد يبقى فيه ارتفاع في نسب الإصابات، وده اللي خلى الحكومة تحذر من إن البلد ممكن تبقى على وشك موجة تانية لفيروس كورونا.

ارتفاع نسبة الإصابات من جديد خلى الحكومة تاخد بعض الإجراءات الوقائية وتقرر بقفل بعض الأماكن تاني، وده اللي حصل في "كتالونيا" يوم السبت الموافق 25 يوليو وحصل إغلاق للحياة مرة تانية لمدة أسبوعين، وقررت حكومة كتالونيا إن النوادي والملاهي الليلية هتقفل أبوابها لمدة أسبوعين، ده غير إن المدن اللي خارج المنطقة الشمالية كمان فيها ارتفاع في عدد الإصابات.

صرحت وزارة الصحة الإسبانية يوم الجمعة إن عدد الإصابات كان أكتر من 900 حالة جديدة، وفريق "فوينلابرادا" وهو فريق في الدوري الإسباني في الدرجة التانية فيه 28 حالة مؤكدة لحد دلوقتي، وقال مراسل "بي بي سي" إن نسبة العدوى بين الشباب مقلقة جدا خصوصا إن الشباب بيتجمعوا بليل، وقال كمان عالم الأوبئة الدكتور "دانيال لوبيز أكون" لـ"بي بي سي" إن متوسط عمر الحالات بيرتفع لإن المرض بينتقل من الشباب لباقي الأسرة وبالتالي كبار السن بيتصابوا.

الجدير بالذكر إن فرنسا أصدرت تحذيرات من السفر لكتالونيا، وفرضت بريطانيا حجر صحي 14 يوم على اللي بيرجعوا من إسبانيا وده هيتطبق بداية من يوم الأحد 26 يوليو، والنرويج كمان هتبدأ في تطبيق إجراءات الحجر الصحي على اللي بيرجعوا من إسبانيا، وألمانيا كمان سجلت أعلى معدل ليها في الإصابات في شهرين وبتحاول تتجنب تفشي الفيروس من جديد مع تخفيف إجراءات الغلق.

العالم سجل أعلى نسبة للإصابة بفيروس كورونا خلال اليومين اللي فاتوا، وكان عدد الحالات المصابة في العالم في يوم واحد 280 ألف حالة.

Comments: