أبرز 10 معلومات عن طبيب الغلابة الدكتور محمد مشالي 

28/07/2020

النهاردة الصبح 28 يوليو صحينا على خبر وفاة طبيب الغلابة دكتور محمد مشالي طبيب الباطنة وأمراض الأطفال عن عمر يناهز الـ 76 سنة بعد ما اتعرض لوعكة صحية مفاجأة اتنقل بعدها للمستشفى.

آخر موسم في رمضان اللي فات ظهر الدكتور محمد مشالي  في برنامج "قلبي اطمأن" ورفض إنه ياخد أي مساعدات مادية اتعرضت عليه من غيث مقدم البرنامج، وبعدها انتشر فيديو البرنامج على وسائل التواصل الاجتماعي وبدأت الناس تحب تعرف مين طبيب الغلابة.

خلينا نقولك أبرز 10 معلومات في حياة طبيب الغلابة الدكتور محمد مشالي:

1- اتولد في محافظة البحيرة سنة 1944 لأب بيشتغل مدرس، واتنقلوا وعاشوا في محافظة الغربية بعد كده.

2- اتخرج من كلية القصر العيني سنة 1967 واتخصص في أمراض الباطنة وأمراض الأطفال والحميات، واشتغل في عدد من المراكز والوحدات الطبية في الأرياف التابعة لوزارة الصحة.

3- فتح عيادته الخاصة في طنطا سنة 1975 وفضل قيمة الكشف في عيادته 5 جنيه لسنين طويلة، لحد ما زادت وبقيت 10 جنيه من فترة قريبة، وفي السبعينات أول ما فتح العيادة كان قيمة الكشف 10 قروش، وفي أوقات كتير بيرفض إنه ياخد مقابل كشفه على غير المقتدرين.

4- وصية والده له هو إنه مايغرمش أي فقير حق تمن كشف طبي أكبر من طاقته، وفضل محافظ على وصية والده لآخر أيامه.

5- دكتور محمد مشالي اتكفل برعاية أخواته وأولاد أخوه اللي توفى في سن صغير وسابهم ليه، عنده 3 أولاد كلهم متخرجين من كلية الهندسة.

6- كانت أمنيته إنه يدخل كلية الحقوق ويبقى محامي قبل الجامعة ولكن دخل كلية الطب عشان يحقق حلم والده ويبقى دكتور.

7- هوايته الوحيدة هي القراية وقال إن الأب الروحي بتاعه هو الدكتور طه حسين خصوصا لإنه كتب كتاب المعذبون في الأرض ووصى الناس بالفقراء والعدالة الاجتماعية.

8- كان بيشتغل أكتر من 12 ساعة في اليوم بالرغم من تقدمه في العمر.

9- قال في واحد من اللقاءات التلفزيونية إن كل علاقته بالتلفزيون هو إنه يتفرج على ماتشات الزمالك وإنه كان بيشجع نادي الزمالك من وهو في المرحلة الإعدادية.

10- محافظة الغربية أطلقت اسمه على واحد من الشوارع في طنطا تقديراً لجهوده، وده بعد ما طالب سكان المحافظة بتكريمه.

Comments: