إليسا "Feminist" في ألبومها الجديد: تغني عن التحرش وحرية رأي المرأة!

01/08/2020

ألبوم إليسا الجديد لسه نازل من كام ساعة ومن ساعة نزوله والناس بتتكلم عنه لأنه ألبومها الأخير مع روتانا حسب ما أعلنت إليسا من فترة بسبب خلافاتها معاهم والمفروض هتبدأ تنتج لنفسها بعد كده.

المهم إن ظهور إليسا كان مختلف جداً في الألبوم ده، فبعيداً عن إن ده الألبوم اللي بتحتفل فيه بـ20 سنة من مسيرتها الفنية وده واضح في بوسترات الألبوم اللي فيها استعادة لصور ألبوماتها القديمة، إلا إن الألبوم مفاجيء شوية لبعض المواضيع اللي اليسا غنت عنها.

في أغنية "وفي" اليسا اتكلمت عن الخيانة بشكل مفاجيء بإن كل الناس بشكل أو بأخر خانوا واتخانوا، وإننا على قد ما كنا أوفياء في العلاقة هنفضل برضو نشوف ناس بتعجبنا، وده جزء من كلمات الأغنية: "لو قد ما أوفيا كنا، بيضل في ناس بتعجبنا، ما حدا يعمل فيها ملاك، كلنا خننا واتخاننا"، وبعض الناس في التعليقات على الأغنية على يوتيوب اتفاجئت من صراحة إليسا في طرحها للموضوع.

وفي أغنية "صاحبة رأي" اللي الألبوم متسمي بيها، إليسا بشكل واضح بتبعت رسالة قوية لكل ست إنها تتمسك برأيها وماتخافش من مواجهة المجتمع بيه، وغير ده بقا فإليسا بالأغنية دي بترد على كل من انتقدوها الفترة اللي فاتت بسبب مشاركتها دايماً بأرائها السياسية سواء في لبنان أو في الأحداث اللي بتحصل في الوطن العربي والعالم، كتير هاجموها وقالولها إن أرائها هتخسرّها محبة بعض الجمهور، وبعض الناس وفيه منهم مشاهير في لبنان كتبوا إن الفنان يغني بس لكن مايقولش رأيه في السياسة، ويقال كمان إن مشكلة إليسا مع روتانا بسبب بعض أرائها، لكن إليسا بترد على كل الناس دي وبتقول "أنا صاحبة رأي وعايشة حياتي بوجهة نظري".

أما القضية التالتة اللي غنت عنها إليسا في الألبوم كانت عن "التحرش" وده بصراحة كان أكتر شيء مفاجيء بالنسبالي، اختارت موضوع حساس جداً خاصة ضمن الأحداث اللي بتحصل حالياً في مصر وفي العالم بحملة "Me Too"، والأغنية دي فيها ذكاء وجرأة من إليسا في اختيار الموضوع، وكمان ذكاء في طرحه بشكل مناسب من خلال الكلمات، وإنها مش لازم تغني عن الحب بس في أغانيها، واختارت عنوان للأغنية "مباحة ليك" وبتوصل رسالة لكل متحرش "مين اللي قالك إنك إنت أي واحدة مباحة ليك" ومعظم التعليقات على يوتيوب من ناس معجبة بطرح إليسا موضوع زي التحرش.

والأغنية اللي هتكلم عنها دي بقا بصراحة مش بتتكلم فيها عن قضية معينة لكن اتفاجئت من كلماتها وهي بتقول "هعتبرك مُت ومن بكرا أنا هلبس أبيض وهخلي أصحابي وأهلي يهنوني! هعتبرك مُت لكن عمري ماهقول في خيالي الله يرحمه واللي يحبني يدعيلي عليه".. إليسا شكلها حوّلت الطاقة اللي عندها بسبب صراعاتها الأخيرة اللي مرت بيها خلال أخر سنتين في اختياراتها لكلمات أغاني ألبومها الأخير واللي بنتوقع إنه هيكون كلام الناس على السوشيال ميديا خلال الأيام الجاية.

وعامة مش دي المرة الأولى اللي اليسا تتبنى فيها قضايا مهمة تتكلم عنها في أغنياتها أو تعبر عنها في كليباتها، لأنها قبل كده في كليب "يا مرايتي" ناقشت في الفيديو كليب قضية السيدات اللي بتتعرض للعنف من أزواجهم.

وفي أخر ألبوم ليها استخدمت قصة نجاحها في هزيمة سرطان الثدي كقصة ملهمة في فيديو كليب "إلى كل اللي بيحبوني" اللي كان رسالة دعم لكل المصابات.

Comments: