إزاي تتصرف مع فقد صديق عزيز عليك!

10/08/2020

بعد وفاة اليوتيوبر مصطفى حفناوي بدأ كل صحابه والناس اللي تعرفه واللي مايعرفهوش كمان يكتبوا عنه على السوشيال ميديا كلام يزعل على حالتهم والإحساس اللي حاسين بيه، ولكن أصحابه هما كانوا الأكتر تأثرا بالخبر، ويمكن ده لأسباب كتير منها إن الواحد بيبقى متوقع إنه يتخانق مع أصاحبه أو يزعل منه شوية بس عمره ما بيخطر على باله إن هيفقد صاحبه للأبد، لكن في الفترة الآخيرة فيه عدد كبير أوي من الشباب عدى بنفس التجربة وفقد صديق عزيز عليه، وممكن موت مصطفى حفناوي فكرهم ورجعهم لنفس الحالة اللي كانوا فيها أول ما سمعوا خبر وفاة صديقهم.

موقع "psychology today" قال ممكن تتصرف إزاي لو فقدت صديق عزيز عليك:

1- حاوط نفسك بدايرة تدعمك:

في الأوقات الصعبة اللي زي دي، أنت محتاج ناس تعتمد عليهم سواء كانوا أهل أو أصدقاء، ناس بتثق فيهم عموما، محتاج تحاوط نفسك بدايرة الدعم الخاصة بيك لإنهم هيفكروك إنك شخص أقوى وهيقدروا يتعاملوا معاك ومع أفكارك وينتشلوك منها.

2- اقبل إن مفيش إجابة:

طبيعي جدا أي حد بيتعرض لصدمة أو لخبر محزن بيبقى عايز يعرف هو قلبه موجوع ليه وتعبان كده ليه، فطبيعي يسأل ليه ده يحصل؟ ويحس إن الحياة بتعمل حاجات سيئة للأشخاص الطيبين ولكن للأسف مفيش إجابة على سؤالك ده، وجزء من عملية الشفاء وتخطي الحزن والصدمة هو إنك تلاقي طريقة للتعامل مع المجهول وتقبل إن مفيش إجابة على سؤالك.

3- خلي بالك من نفسك:

إنك تخلي بالك من نفسك لما تفقد حد غالي عليك ده في حد ذاته تحدي أصلا، لإن كل حاجة في حياتك هتتقلب 180 درجة والحاجات اللي كنت بتشوفها سهلة في الأيام العادية هتبقى تقيلة ومعقدة، وبالرغم من إن الشخص بيحس إنه مش عايز ياكل ولا ينام إلا إنك لازم تمارس حياتك بشكل طبيعي عشان تخلي بالك من جسمك، لأن العناية بجسمك بتأثر في صحتك النفسية والعاطفية.

4- اتعامل مع اليوم بيومه:

حاول إنك تخلي تفكيرك يبقى ثابت في الحاضر، خصوصا كمان إنك لما تفضل تفكر في الماضي مش هيفيدك بحاجة بالعكس ده هيخليك أبطأ إنك تتخلص من مشاعرك المرهقة، وعلى قد ما تقدر حاول تسترخي وتنتفس بهدوء لأن ده هيساعدك تتخلص من التوتر والضغط، وإدي عقلك فرصة إنه يفكر في الدقيقة الحالية في الساعة الحالية في اليوم الحالي بس مش أكتر لا في الماضي ولا في المستقبل.

5- اعمل حاجات بسيطة تخفف حزنك:

الراحة في الأوقات اللي زي دي هو إنك تعمل حاجات لطيفة ومفيدة ليك، ويمكن تبقى حاجات صغيرة بتساعد على تخفيف التوتر والحزن، ولو دورت هتلاقي إن فيه حاجات صغيرة بتخلي الأوقات الصعبة سهلة أكتر، زي مثلا إنك تدخل تخبز أو تعمل أكل، أو تتغطى ببطانية بتحبها وتتفرج على فيلم أو مسلسل بتحبه، ومهما كانت الأفعال دي صغيرة إلا إنها بتساعدك فعلا تبقى أحسن.

6- اشغل نفسك بحاجة:

في بعض الأوقات لما بتحس بالحزن أو العجز عن تصليح الواقع بيبقى أحسن حاجة تعملها هو إنك تشتت نفسك وتشغلها، وممكن تفكر إنك تعمل حاجة تخلد ذكرى صديقك أو تعمل حاجة هو كان متحمس يعملها.

لكن خلينا نقولك في الآخر إن مفيش حل سريع للتخلص من الألم ومفيش حد بيتخطى الوجع والزعل والصدمة في يوم وليلة، ويمكن تحس في الأول إن الألم مش هيختفي أبدا، ويمكن ده صح فعلا، لكن مع مرور الوقت الذكريات مش هتخليك تعيط وهتخليك تبتسم وتترحم على الشخص اللي فقدته ومنحنى الحزن هيقل، والذكريات الكويسة هتسيطر عليك أكتر من الذكريات السيئة، وبمرور الوقت أكتر هيجي عليك وقت تحس إنك كنت ممتن إن صديقك ده كان في حياتك، ربنا يرحم كل اللي فقدناهم.

Comments: