لكِ سيدتي: ليه تخلي ابنك يلعب في الرمل!

11/08/2020

بمناسبة الصيف والحر والمصايف كل عيلة بيكون فيها طفل رايح يصيف لازم يبقى رايح معاه العدة بتاعته وهي الجردل والمعلقة الكبيرة دي وقوالب أشكال مختلفة عشان يعمل أشكال بالرمل، ويمكن منظرهم وهما بيلعبوا بالرمل من ألطف المناظر اللي بتحبها في المصيف، لكن اللعب في الرمل طلع فوايده مش بس مقتصرة على اللعب والانبساط، وطلع له فوايد تانية كتير بغض النظر هما على البحر ولا في أي مكان بيلعبوا بالرملة.

موقع "baby sparks" قال فوايد اللعب بالرمل للأطفال وهما:

1- اللعب بالرمل بيطور الإحساس:

وفيه كذا طريقة بيطورها زي حاسة اللمس اللي بتطور عن طريق الضغط واكتشاف درجة الحرارة، فمثلا الطفل بيكتشف الفرق بين الرملة السخنة اللي في الشمس والرملة الباردة اللي ف الضل، وبيتعلم إزاي يحرك الرمل مع وده بيعمله يحرك ايده مع أوزان.

2- بيساعد على التطور البدني:

اللعب في الرمل بيطور المهارات الحركية للأطفال وبيساعد على بنا تنسيق بين العين والإيد، ولما بيمسك الجردل والمجرفة بيمارس مهاراته الحركية الدقيقة وطبعا بتزيد المهارات الحركية لما بيرفع جردل فيه كمية من المياه.

3-  بيبني الخيال والإبداع:

فيه احتمالات كتير للإبداع في الرمل زي الرسم عليه أو بنا أشكال مختلفة زي الجبال والقلعة اللي كلنا عملناها والموجة جت هديتها، وطبعا ده لوحده بيعلم الصبر والتعامل مع الأحلام والطموحات اللي اتهدت.

4- بيطور المهارات الاجتماعية واللغوية:

يمكن اللعب في الرمل بيعتمد فيه الطفل على نفسه أكتر من كونه بيلعب مع مجموعة، لكن زي ما احنا متعودين نشوف هنلاقي الشاطئ كله مليان أطفال، في الغالب اللعب في الرمل بيخلي الأطفال يتعرفوا على بعض ويلعبوا ويحفروا مع بعض حتى مش مهم يبقوا عارفين بعض، ولكن ده بيعلمهم التواصل توإنهم يكونوا صداقات.

5- اللعب في الرمل بيعزز المناعة:

أي أب وأم بيتضاقوا جدا لما بيشوفوا ابنهم أو بنتهم متوسخين، لكن الأبحاث والدراسات أكدت إن الأطفال اللي بيلعبوا في الرمل والتراب والطينه والأماكن المفتوحة عموما جهازهم المناعي أحسن من الأطفال اللي قاعدين طول الوقت في أماكن معقمة، ولكن طبعا مهم جدا قبل ما الطفل يقعد في أي مكان أهله يتأكدوا إن الرمل اللي هيلعب فيه مافيهوش أي إزاز مكسور أو فضلات الحيوانات.

Comments: