٦ خطوات عشان تقنع أي حد بحاجة عايزها

12/08/2020

حتى لو كنت شخص مطيع ودايما بيسمع الكلام دايما بتاع أي حد له سلطة عليهن فأكيد هيجي عليك وقت تعوز حاجة مختلفة، وده اللي هيخلي جزء الزن المستخبي جواك اللي ماكنتش تعرف عنه حاجة يظهر ومش هتقدر تسيطر عليه.

أكيد في وقت ما زنيت على أهلك أو صحابك عشان خروجة أو سفرية أو حتى أكله أو على مديرك عشان شغل أو زيادة في المرتب أو زنيت على عميل عشان يشتري حاجة، ولكن مع كل مرة بتطلب فيه حاجة عايزها بشدة كده بتكتشف إن الزن مش هو الوسيلة الوحيدة اللي ممكن توصلك للي إنت عايزة، بالعكس ده ممكن يتسبب لك في مشاكل والحاجة اللي عايزاها تترفض بسببه، وكل ما بتكبر أكتر بتكتشف إن فيه طريقة عشان تقنع اللي قدامك باللي عايزة، موقع "businessinsider" كتب في مقال من مقالاته سيكولوجية الإقناع وقال إن فيه 7 طرق توصلك للي إنت عايزه وهما:

1- خليك واثق في نفسك:

الخطوة الأولى هي إنك تبين ثقتك في نفسك طول ما إنت بتتكلم ولإن كل ما زادت ثقتك كل ما بان إن كلامك بقى مقنع أكتر وهتظهر قوتك، وعموما الثقة سهلة وممكن تزيفها صعب حد ياخد باله إذا كانت حقيقية ولا تمثيل عشان كده لو كنت حتى مش واثق في نفسك اتصرف بثقة وده كفاية، في دراسة عملتها جامعة "ليستر" في إنجلترا بتقول إن الاختلاف السلوكي الوحيد بين المقنعين والمقتنعين هي الثقة.

ومعنى الثقة هو إنك تبقى واثق تماما في نفسك وإنت بتقنع الطرف التاني وإنه هيوافق وده هيساعد إنه يديك اللي إنت عايزه، بس برضه خليك حريص وماتبالغش في الثقة يعني لانهم ممكن يبعدوا عنك أصلا لإنك شخص مغرور.

2- قدم حجج منطقية:

الناس سهل يتم إقناعها بالمنطق، الإقناع هو عملية تغيير معتقدات الطرف التاني أو سلوكه عن طريق حجة أخلاقية أو منطقية بدل من القوة، ولما بيتم إقناع شخص ما بحاجة يعملها وبيعملها فبينفذها عشان بقى مقتنع إنها الأصح أو الأفضل، على سبيل المثال لو هتقنع زميلك في الشغل إنه يشتغل على حاجة أصعب، في الأول هيقاوم ويرفض ولكن ممكن تستخدم حجة منطقية وإنت بتقنعه زي إن المهمة دي القسم بتاعته أحسن يعملها زي مثلا إنها هتتعمل أسرع وبكفاءة أعلى وده هيساعد الشركة.

3- خلي الحجج كأنها مفيدة للطرف التاني:

واحدة من الأسباب اللي هتخلي الطرف التاني يوافق على طلبك إن الظروف تكون مناسبة مثلا خلينا نتخيل إنك بتحاول تقنع واحد صاحبك إنه يساعدك تنقل، أكيد ده هيتطلب منه شغل كتير وممكن صاحبك مايكونش مستعد لده، فبدل ما تكلمه عن كمية العفش اللي هيساعدك في نقلها، كلمه عن قد إيه الموضوع هيبقى حلو ومسلي لما تفرشوا البيت مع بعض وإن لما هتخلصوا هتطلبوا أكل والكل هياكل أو إنك هتدي له حاجات قديمة إنت مش محتاجه مفيدة بالنسبة له.

4- اختار كلامك بدقة:

فيه كلمات ليها قيمة أعلى من غيرها وفيه كلمات ليها ارتباط إيجابي أكتر من غيرها، الهدف من اختيار الكلمات مش إنك تدخل كلمات كبيرة وصعبة في جمل الهدف عو إنك ترتب كلامك عشان تتأكد إن المعنى دقيق ومظبوط، أثناء العملية دي هتظهر إنك شخص متواصل أحسن وهيخليك أكتر ذكاء وجدير بالثقة أكتر.

5- ضيف شوية تملق:

ممكن تبقى أرخص نقطة في النقط دي كلها لكن برضه حاول تبقى صريح، بمعنى إنك تستخدم الصيغ الصح والكلمات المناسبة للموقف وتكون منطقية، مثال لو عايز تقنع مديرك إنك تروح ساعة بدري فبدل ما تقوله "الله إيه الهدم الحلوة دي ممكن امشي ساعة بدري" ممكن تقوله "ممكن امشي النهاردة ساعة بدري أنا عارف إنك شخص مرن وكنت عايز استأذنك"

6- خليك صبور:

صعب جدا تقنع حد وتوصل للي إنت عايزة من أول محاولة، فلو مانجحتش أول مرة ماتقفلش المناقشة، خلي الموقف يعدي وافتح الموضوع مرة تانية وأكيد فيه رسايل تانية مقنعة هتجيلك في عقلك الباطن لحد ميعاد النقاش التاني عشان كده الفرصة التانية هتبقى عقلانية أكتر ومقنعة أكتر، بلاش تتخلي عن هدفك لكن خلي فيه وقت بين المحاولتين.

خليك فاكر إن الإقناع هو مهارة، وإنك مش لازم تستخدم كل الخطوات دي وإنت بتقنع حد بس كل ما زاد استخدامك لنقط منهم كل ما فرصتك في الإقناع هتزيد، ومع كل مرة هتحاول فيها مهارتك هتزيد كمان.

Comments: