ليه محمد فوزي فنان هيفضل محبوب في كل العصور؟

13/08/2020

فيه فنانين بيعدي الزمن عليهم وبنبدأ نتعامل معاهم كتاريخ وتراث، بنحبه ونقدره لكن هو نفحة من زمن تاني بمقاييسه وتقييمه للجمال، لكن فيه نوع تاني من الفنانين بيبقى عنده بعد نظر ورغبة في التطور وعمل قفزة لقدام، دول لما هتسمع فنهم النهاردة مش هتحس إنك صعب تحبه ولا إنه بعيد عنك ومن أهم الناس اللي قدروا يعملوا كده وحرفيًا يكسبوا "زمنهم وزمن غيرهم" هو محمد فوزي، واللي هنفند هنا شوية أسباب ليه هيفضل محبوب في كل العصور؟

1- محمد فوزي كان من المجددين في الموسيقى والأغاني، هتلاقي دايمًا متطورة عن أغاني عصرها، كان من أوائل المشجعين لفكرة الأغنية القصيرة الخفيفة، وبيقال إن ده من الأسباب اللي خليته ما يتحمسش جدًا للتعاون مع أم كلثوم ويرشحلها بليغ حمدي بدل منه.

2- هنا فيه قصة شهيرة عن إن أم كلثوم طلبت من "فوزي" إنه يلحن لها، وأغنية "أنساك" كان تم إسنادها له بالفعل، لكن هو اللي رشحلها وقتها بليغ حمدي وقالها إنه له مستقبل واعد وهيقدر يقدملها المناسب لها أكتر، بجانب إن هو ماكانش بيميل للأغاني الطويلة، وده زي ما بيعكس فنان مش أناني فهو بيعكس فنان واعي لقدراته ولأهدافه.

3- "فوزي" ممثل لطيف، ما ورطش نفسه في أدوار أكبر من قدراته التمثيلية، أفلامه بيقدم فيها شخصيات ما اختلفتش عن بعضها كتير، لكن كان ناجح في إطارها، وهي الشاب اللي دمه خفيف من غير افتعال، بيغني في إطار منطقي خلال الأحداث، فمش هتتفرج على الفيلم بس عشان الأغاني، لكن عشان هو كمان لطيف ومقبول وتمثيله مش تقيل فمش هتضايق من إن الفيلم شغال جنبك.

4- أول أكابيلا مصرية أو استخدام لصوت الكورال بس بدل الآلات في عمل اللحن، اللي عملها كان محمد فوزي، وهي أغنية "كلمني طمني"، وعلى الرغم من مرور كل الوقت ده عليها إلا إنك ممكن تسمعها النهاردة من غير ما تحس بفجوة زمنية كبير أو إنها بدائية أوي.

5- من أفضل الفنانين اللي قدموا دويتوهات سواء سينمائية وغنائية، لأنه مش أناني، بيسمح إن النجمة اللي معاه تطلع أحسن ما عندها، طلع مع عدد كبير من المطربات زي ليلى مراد وفايزة أحمد وصباح وأخيرًا نازك اللي طلعت معاه في فيلم "كل دقة في قلبي" وكان سبب انطلاقتها ونقدر نقول إن أغنيتها فيه واللي بتحمل نفس اسم الفيلم أصبحت أغنية أيقونية مش بس في تاريخها لكن في التراث الغنائي المصري بشكل عام.

6- استكمالًا لفكرة عدم الأنانية فمش شرط لما تشوف فيلم لـ "فوزي" يبقى هو مسيطر عليه تمامًا، يعني لو بطلة الفيلم مطربة عادي إنك تلاقيها عاملة أغنية غاية في الجمال و"فوزي" مش هو ملحنها زي أغنية "ليه يا قلبي" و"يا لاسمراني" لفايزة أحمد في فيلم "ليلى بنت الشاطيء".

7- "فوزي" من علامات أغاني الأطفال في عصره، واللي لسة عايشة لحد دلوقتي زي "ماما زمانها جاية"، و"أحن قلب" اللي غناها مع نازك إهداء للأمهات.

8- دويتوهات "فوزي" مش بس كانت غنائية مع فنانات لكن كمان كانت سينمائية مع فنانين زي إسماعيل ياسين وسليمان نجيب، كانت من أفضل ظهور لهم في الأفلام الكوميدية والرومانسية، زي "الآنسة ماما" و"فاطمة وماريكا وراشيل" و"يا حلاوة الحب".

9- محمد فوزي لحن أول أغاني "فرانكو آراب" بتجمع بين الشرقي والغربي وعمل بيها صدى واسع جدًا وهما "يا مصطفى يا مصطفى" واللي ظهرت في فيلمين هما "الحب كده" و"الفانوس السحري" وأغنية "فطومة" اللي كانت في فيلم لهند رستم اسمه "فطومة" بردو، وأخيرًا أغنية "علي بابا" واللي غناهم كلهم هو برونو موري أخو المطربة داليدا.

10- محمد فوزي كملحن فهو الجندي المجهول خلف أغاني عظيمة ومهمة كتير زي "ساكن في حي السيدة" لعبد المطلب، "كل دقة في قلبي" لنازك، "تسلم لقلبي" لهدى سلطان، "يا أعز من عيني" لليلى مراد.

Comments: