٧ خطوات هتخليك واثق في نفسك زي حمو بيكا 

13/08/2020

مفيش حد بيتولد واثق في نفسه، بس الشخص الواثق في نفسه بيشتغل فترة من حياته على إنه يبني الثقة دي، ويمكن على قد ما يبان كلام "كليشيه" إلا إنه ملموس في أشخاص معينة زي ما بيبان على حمو بيكا في الفيديوهات اللي بيبقول فيها معلومات غلط أو بينطق الكلام بشكل غلط ولكن بيبقى واثق من اللي بيقوله جدا.

عشان تبقى واثق في نفسك زي حمو بيكا، محتاج تعمل الخطوات اللي موقع "Lifehack" قالها في مقال من مقالاته وهما:

1- خليك محدد:

اعرف إيه الحاجة اللي إنت مش واثق في نفسك فيها وامتي بالظبط بتفتقر الثقة في نفسك، وبمجرد ما تعرف إيه هي بالظبط هيبقى عندك شئ ملموس عشان تتعامل معاه، وتعرف إيه المنطقة اللي محتاج تزود ثقتك في نفسك فيها.

2- اكتشف الحاجات اللي هتديك ثقة في نفسك:

فكر في الأوقات اللي كنت واثق فيها في نفسك، وركز واعرف إيه الحاجات  اللي كانت بتديك إحساس بالقوة والثقة في النفس زي مثلا  البيئة اللي كنت فيها أو الناس اللي كنت معاهم وكل ما وضحت الأمور لنفسك أكتر كل ما بقيت أحسن، ولإنها حاجة فردية بتختلف من شخص للتاني فلازم تدور بنفسك.

3- خليك صادق مع نفسك:

واحدة من أوحش الصفات اللي هتخليك تفقد ثقتك في نفسك هي محاولاتك إنك تبقى شخص تاني غير نفسك، خليك صادق مع نفسك وخليك نفسك، زي حمو بيكا كده بيتكلم بطريقته وبيتكلم عن حياته قبل الشهرة بكل أريحية وماعندوش مشاكل معاها ومهما كان قدامه كاميرات طريقته في الكلام مابتتغيرش، عشان كده فكر في الحاجة اللي بتميزك وفكر في الحاجات المهمة بالنسبة لك واكتبهم دايما.

4- خليك فاكر إن مفيش حد كامل:

ممكن تبقى مش أشطر واحد بيعرف يتكلم لكن أشطر واحد بيكتب، وممكن تبقى مش أحسن صديق لكن أحسن أب أو زوج.. فيه ناس كتير بيضيعوا وقتهم في تحسين الأماكن اللي شايفين نفسهم مش كويسين فيها، فبدل كده ممكن تعترف بمهاراتك اللي إنت ناجح فيها، فجرب تكتب 3 حاجات في أسبوع واحد شوفت نفسك عملتها كويس وخليك بنفسك من غير ما تبص على أعداءك زي ما بيكا بيقول في كل مهرجاناته.

5- بطل تقارن نفسك بالناس:

يمكن النقطة دي مرتبطة بالنقطة اللي قبلها، لما هتبص على الناس اللي حواليك هتبقى بتقارن نفسك بيهم وخصوصا مع تطور فكرة السوشيال ميديا فكل واحد بيبص على حياة الناس الحلوة في الصور، لكن ده هيخليك تنشغل بيهم وتنسى تحقق نفسك، ولو كنت محتاج أوي تقارن نفسك بحد قارن نفسك بنفسك على فترات مختلفة. 

6- قول لنفسك إنك كفاية: 

ممكن تبان جملة مبتذلة ولكن جربها هيكون ليها تأثير إيجابي عليك وعلى عقلك الباطن، ولو عندك كلمة تقدر تدي بيها ثقة لنفسك أكتر اعمل كده وكررها لمدة كبيرة، عمرك سمعت حمو بيكا بيتكلم على نفسه بطريقة سلبية؟

7- دور على شخص يشجعك:

زي مابتفتح اللايف بتاع حمو بيكا كده وتلاقيه بيتجاهل أعداءه وبيتكلم مع الناس اللي بيشكروا فيه، ولو اتخانق مع حد اشتغل معاه بيستغنى عنه على طول، أعمل إنت كمان كده بس بالطريقة بتاعتك، خلي الناس اللي بيشجعوك وبيدوك طاقة إيجابية وبيفهومك دايما جنبك وقضي معاهم وقت أطول، وقلل من وقتك مع الناس اللي بيزعزعوا ثقتك في نفسك.

Comments: