١٢ حاجة على السوشيال ميديا لو حد بيعملها معاك يبقى بيكراش عليك!

19/08/2020

فيه ناس بتقعد سنين ماتفهمش إن اللي قدامها معجب بيها مهما عمل الشخص لكن مابيفهموش إن كل اللي بيعمله ده معناه إعجاب.

عشان كده الموضوع ده ليكم، وفيه دراسة عملتها أنا و4 أصحابي بتقول إن لو فيه شخص عمل 5 حاجات من الـ12 حاجة الجايين دول معناها إنه معجب بيكم!

1- لو أول مابتبعت رسالة بتلاقي علامتين الصح بقوا لونهم أزرق علطول، أو لو بعتتله رسالة وفي ثواني اتكتب جنب اسمه "أونلاين" اعرف إنه معجب بيك وقاعد مستنيك تبعت رسالة عشان يتكلم معاك.

2- بيعملك Reply على معظم الـ Stories اللي بتنزلها ولو ملقاش كلمة يقولها في الـ Reply بيعمل React بأي Emoji.

3- أي صورة بتنزلها على انستجرام بيعملك لايك عليها، ولو على الفيسبوك هتلاقي أكتر React بيعمله على صورك هو Love.

4- لو لقاك أونلاين في وقت متأخر بالليل بيدخل يكلمك أو يسألك أي سؤال، لو فكرت في هو السؤال ده مهم هتلاقيه مش مهم؟ ولو فكرت في أي سبب ممكن يخليه يسألك انت بالذات السؤال اللي ممكن يلاقي إجابته على جوجل ده هتلاقي مفيش سبب غير إنه معجب.

5- لو هو كلبوب هيقعد يلمّح عن طريق إنه يعمل Share لبعض الأغاني من نوعية معجبة مغرمة أنا بقى مش عايزة إلا هو، ولو عميق شوية هتلاقيه بيشيّر Quotes بالإنجلش فيها رسايل موجهة.

6- على البوستات بقى، مش هيعمل لايك على كل البوستات بل هيعمل لايك على بوستات معينة تكونوا عاملين فيها شير لخبر اتنين مشاهير اتجوزوا مثلاً، وبيبقى اللايك هنا معناه "أنا أهو.. أنا موجود".

7- هيعمل Haha على أي كوميك هتنزله حتى لو كان ميم من صفحة الخليل كوميدي.

8- على انستجرام ممكن يعمل فولو لبعض الـ accounts والـ Pages اللي انت عاملها فولو ويعمل like لما ينزلوا أي حاجة عشان تشوف اسمه تحت البوست وكمان عشان يبين إن بينك وبينه اهتمامات مشتركة.

9- هيعمل Share لنوعية بوستات شبه اللي أنت بتعملها Share كنوع من أنواع لفت النظر. 

10- افتح الشات بينك وبينه لو لقيت إن الشات كله عبارة عن 5 سطور كلام منه، ورد واحد في سطر واحد منك وبعدها 5 سطور منه وسطر واحد منك، فهو بنسبة كبيرة معجب وحابب يرغي معاك.

11- طبعاً مش محتاجين نقول إنه بيستخدم معاك في الرسايل Emojis كتيرة لقلوب بألوانها المختلفة وkisses كتير.

12- هيحرص إنه يكون موجود عندك على كل مواقع السوشيال ميديا سواء تويتر أو إنستجرام أو فيسبوك ولو عندك تيك توك هيعملك فولو هناك برضه.

لو لقيت شخص بيعمل أكتر من حاجة منهم فاحتمال كبير يكون بيكراش عليك، فبسرعة لو بتكراش عليه إنت كمان روح قوله وعيشوا أيام كلها حبه جنة أنا عيشت فيها، ولو مش بتكراش عليه وضحله ده وخليك صريح عشان مايفضلش متعلق بيك على الفاضي.

Comments: