بعد خطوبة هبة طوجي لإبراهيم معلوف: “إيه مصير علاقتها بأسامة الرحباني؟”

19/08/2020

من يومين تم إعلان خطوبة المغنية اللبنانية "هبه طوجي" على الموسيقار "إبراهيم معلوف"، والمتابعين بتوعهم فرحولهم جداً واتحمسوا مش بس عشان خطوبتهم لكن عشان ده معناه إن احتمال الاتنين يتعاونوا مع بعض في أعمال غنائية وموسيقية!

بس ده هيخلينا نسأل سؤال "هل خطوبتها بإبراهيم معلوف هتأثر على علاقتها بأسامة الرحباني؟" وهي إيه أصلاً طبيعة علاقتها بأسامة الرحباني؟!

متابعين هبة طوجي عارفين بكل تأكيد إن أسامة الرحباني هو المنتج الموسيقي لكل أعمال هبة، وهو كمان الملحن الوحيد اللي هي بتشتغل معاه من ساعة ما دخلت عالم الغناء مش بس كده كمان هو ساعات بيظهر بشكل أقرب لمدير الأعمال بس بصلاحيات أكبر شوية، وبنلاقيه في كل حفلاتها ومعظم اللقائات الإعلامية اللي بتعملها، والناس واخدة انطباع إنه المتحكم في قراراتها سواء في حفلاتها وأغانيها واختياراتها، بس هل وقفت العلاقة عند الناحية العملية بس؟

لو كتبتوا على جوجل أسامة الرحباني وهبه طوجي هتلاقوا مواقع كتير كاتبة عن سر علاقة هبه طوجي وأسامة الرحباني وهتلاقوا أخبار عن إنهم مرتبطين وبتجمعهم علاقة عاطفية، لكن بعيداً عن كلام المواقع ومدى دقته، تعالوا نشوف في أكتر من مناسبة إعلامية اتسألوا فيها عن علاقتهم، طريقة إجاباتهم كانت إيه.

لميس الحديدي لما استضافتهم في برنامج "هنا العاصمة" سألتهم عن علاقتهم لكن أسامة رد بإجابة عايمة مع إنه يقدر يختار مابين اجابتين واضحين سواء نعم أو لأ، لميس سألته "هل علاقة عمل فقط أم حب؟" لكنه جاوب قال "فيها كل شيء من الحب.. الحب الروحاني والحب الفكري، كل الأشياء بيمرء فيها الواحد بيقدر يفهم التاني مظبوط، كل واحد يفهمها متل ما بده الشغله" وبما إنه قال كل واحد يفهما زي ماهو عايز فأعتقد يا أسامة ناس كتيرة عندها فهمت وعندها اعتقاد وانطباع إن فيه علاقة حب بتجمعكم.

واتسألوا مرة كمان في برنامج "أحلى ناس" على قناة الجديد اللبنانية، وأسامة جاوب إجابة أقرب إلى تهرب من الجواب، حتى الإعلامية رابعة الزيات قالتله "لا عطيت حق ولا باطل".

أما إجابات هبه طوجي كانت في نفس السكة بس كانت بتدي مساحة لأسامة هو اللي يجاوب بكلام أكتر لما بيسألوهم السؤال ده بالذات، بس أقرب إجابة بتثبت إن كانت فيه علاقة بينهم هي إجابة هبة لما تم استضافتها هي وأسمة على قناة "المستقبل" اللبنانية لما قالت بشكل واضح "أنا بعتبر إن عندي Commitment لأسامة بس مو ضروري أحط الخاتم"

فكده نقدر نخمن أو نوصل لنتيجة من إجابتهم إن بنسبة 90% كانوا مرتبطين، عشان كده جمهورها اتفاجيء من خطوبتها لإبراهيم معلوف لأنهم كانوا متوقعين الخبر يبقى خطوبتها لأسامة، ومن هنا نبدأ نتسائل أسئلة اعتقد هتبقى مصيرية في مشوار هبة طوجي الفني والغنائي السنين الجاية، هل ارتباطها وخطوبتها هي انفصال فني وعاطفي عن أسامة الرحباني؟ هل بعد ماكانت مابتعملش أغاني غير مع أسامة هيسيبوا بعض وهتقدم أعمال غنائية سواء مع إبراهيم أو بشكل فني مستقل؟ ولا رغم الانفصال بينها وبين أسامة هتفضل على علاقة فنية وعملية معاه وهتستمر في تقديم أغاني من انتاجه وألحانه؟ وهتكون رد فعله إيه لو إبراهيم معلوف بما إنه موسيقار يقرر إنه يتدخل في أعمال هبة طوجي بعد ماكان ماحدش بيتدخل غير أسامة الرحباني؟

كلها أسئلة هنعرف إجاباتها الأيام الجاية لما تبدأ هبة طوجي تشتغل على ألبومها الجديد، وسواء هتنفصل فنياً عن أسامة أو لأ، فاحنا متأكدين إن هبة طوجي بموهبتها وصوتها هتقدم أعمال فنية هتعجب جمهورها ومحبيها.

Comments: