٧ خطوات هتخلصك من سيناريو الخذلان وخيبة الأمل المؤلم 

23/08/2020

أول ما يبقى عندك أهداف وطموحات معينة بتسعى لتحقيقها هتحس وتعرف إن مش كل اللي بتتمناه بيتحقق بالظبط وهتعرف إن ده الواقع، وهتواجه الحياة الحقيقية فعلا اللي هتخليك تتعامل مع الخذلان وخيبات الأمل، بس تعاملك مع الموضوع هيفرق في كل مرة لحد ما تتعامل مع الخذلان بكل أريحية و تبني أحلام وطموحات تاني وهتحاول تحققها وتسعى وراها.

لكن لو إنت شخص حساس هتفضل تتأثر برضه حتى لو بنسبة بسيطة بخيبة الأمل والخذلان، موقع "psychology today" وموقع "sheri fink" قالوا في مقالات ليهم إزاي تتعامل مع الخذلان وهما:

1- طبيعي جدا تبدأ مشاريع أو أحلام جديدة وتبقى سعيد ومتوقع أحسن حاجة، ولو ماحستش بالمشاعر دي مش هتبدأ حاجة جديدة أبدا في حياتك، لكن عشان ماتتصدمش حاول تبص للموضوع بواقعية أكتر واستعد لخيبة الأمل أو إن الأحلام السعيدة دي ممكن ولو باحتمال 1% ماتتحقش في النهاية.

2- اقبل مشاعرك زي ما هي، عن طريق إنك لما تتعرض لخيبة أمل قدر مشاعرك وادي نفسك فرصة للتعامل معاها، وابعد عن الشخص أو الشئ اللي مسببلك الإحساس ده، واقبل شعور الحزن أو الغضب أو الأذى، وبعد ما تقبل المشاعر دي حاول تتعامل معاها.

3- اتواصل مع ناس تانية، لو كنت لسه غضبان اتكلم مع حد من صحابك، واتكلم في الحقايق اللي مضيقاك بمعنى أوضح شارك مشاعرك مع حد، وبلاش تحس إنك تقيل على اللي حواليك وإن عادي لما تبان قدامهم ضعيف لإنك لما تحس إن فيه عدد حتى لو قليل جدا من الأشخاص اللي إنت واثق فيهم هتشوف نور في نهاية الطريق لإن الحياة ماوقفتش عند الشخص أو الشئ اللي إنت خسرته.

4- عدي اللي حصل خلاص واعتبره خلص، على سبيل المثال إن صديق ليك خذلك في حاجة وإنت مش هتقدر ترجع معاه زي ما كنت تاني والموضوع انتهي بالنسبة لك، حاول ماتخليش الموضوع يهد لك ثوابتك وحياتك كلها، لإنك لما تفصل مشاعرك عن الحقيقة هتدرك إن المشكلة في الشخص مش في مفهوم الصداقة فالأفضل إنك تسيب العلاقة اللي ضرتك وتكمل حياتك عادي وهتكسب صحاب تاني، طبعا الموضوع مؤلم في الأول لكنك هتقدر تتخطاه بمرور الوقت ومش هيبقى بنفس حجمه بعد فترة.

5- شتت نفسك بمجرد ما تاخد الإجراءات السليمة في الموضوع لإن التشتيت هيكون وسيلة كويسة عشان تكتسب طاقة إيجابية تاني، فحاول تعمل حاجة تسليك أو حاجة بتحبها.

6- تخطى الموضوع واعرف إن الحاجة اللي خسرتها إنت خلاص خسرتها ومش هتخسرها تاني واعرف إزاي تكسب اللي باقي، وانطلق تاني وابدأ حقق اللي عايز تحققه حتى لو بطريقة تانية أو عن طريق أشخاص تانية لإنك خلقت مساحة لحاجات تانية ممكن تفوز بيها بعد كده.

Comments: