أغرب 10 فيديوهات تخطت المليون مشاهدة على يوتيوب في مصر!

26/08/2020

عملنالكم جولة سريعة في أغرب فيديوهات من مصريين على يوتيوب عدت المليون مشاهدة.

1- فيديو بعنوان "خسرنا بعض بسبب تنظيف السلم" على قناة يوتيوب اسمها "قناة يومياتي أنا وسيلفتي" وبيجسد خناقة جدلية بين واحدة وسيلفتها على مين اللي هتكنس السلالم وبتزيد المشادات الكلامية وكل واحدة فيهم بتقدم حجج منطقية وغير منطقية لأن واحدة فيهم بتقول مش هكنس غير قدام شقتي والتانية بتقولها لو ضيوف دخلوا البيت هيقولوا أهل البيت مش نضاف؟ والتشويق بيفضل مكمل لحد أخر دقيقة.

2- فيديو "نقلنا العفش لبيتنا الجديد وللأسف انكسرت" على قناة يوتيوب اسمها "حمدي ووفاء" ودي أسرة بتعمل فيديوهات على يوتيوب منها فيديو تاني عدى المليون مشاهدة كانوا بيتحدوا بعض مين هياكل 60 بيضة مسلوقة، بس الفيديو بتاع العفش تخطى المليون ونصف مشاهدة وهو توثيق لخطوات نقلهم العفش من بيتهم القديم للبيت الجديد لحظة بلحظة.

3- فيديو "حماتي كانت تعبانة شوفوا نزلت عملتلها إيه" على قناة يوتيوب اسمها "من بيت حسناء" وخلال الفيديو حسناء عملتلها شعرية بالسكر وبتاخدنا معاها في جولة شاملة في شقة حماتها.

4- فيديو على قناة اسمها "أم سليم" في أول الفيديو أم سليم بتقول "هعملكم مقلب في جوزي اسمه مقلب الإهانة هفضل أهين فيه أهين فيه لغاية ما يجيب كل اللي عنده هنشوف بقا هيضربني أو هيموتني احنا مع بعض وهنشوف كل حاجة" وبنشوف الفيديو فعلاً بتفضل تهين فيه تهين فيه وهو يتعصب وقام هددها يرميها بالطفاية ويلسعها بالسجاير بعدين بيقوم يقعد عليها عشان يفطسها والفيديو تخطى الـ 2 مليون مشاهدة.

5- فيديو بعنوان "اتجننت وقصيت شعر بنتي شوفوا الكارثة" على قناة "كوني ملكة مع جنى" الفيديو تخطى الـ 8 مليون مشاهدة والناس كلها كانت مهتمة تدخل تعرف إيه هي قصة شعر بنتها الجديدة وياترى إيه الكارثة اللي حصلت.

6- فيديو لواحد اسمه محمود بعنوان "أكلت الثعبان فلفل حار يا ترى هيموت ولا هيعيش" وبالتأكيد ده سؤال وجودي بيدور في عقل مشاهدين كتير دخلوا شافوا الفيديو اللي عدى مليون و 600 ألف مشاهدة عشان يشوفوا إيه رد فعل الثعبان.. ياترى الثعبان هيعجبه طعم الفلفل الحار أكتر ولا الرومي؟

7- على قناة بنت اسمها "غادة" نزلت فيديو بعنوان "قررت اختبر خطيبي وطلع خاين" وغادة في الفيديو بتبعت لخطيبها من رقم تاني على الواتساب على أساس انها بنت تانيه وبتلاقي رد فعل خطيبها إنه بيتجاوب معاها وعايز يقابلها، وفي أخر الفيديو غادة بتعيط وبتقول "أأأهههيء مش قادرة أكمل الفيديو بس هو كده طلع خاين" وبعدها بتنهار من العياط شبه عياط رانيا فريد شوقي في مسلسل "نقطة ضعف".

8- أما الفيديو ده فهو منفرد ومكتمل في عناصر الإثارة والتشويق وهو عن واحد الجاموسة بتاعته اتسرقت وراح خد ابن الراجل اللي سرقها ورماه في الترعة.

9- فيديو اختبار جدعنة الأصحاب واحد عمل اختبار لصاحبه بإنه جاب خطيبته وقعدها مع صاحبه عشان نشوف صاحبه هيوافق يخونه مع خطيبته ولا هينجح في الاختبار!

10- وده فيديو بعنوان "القطة هربت من جنة وبكت ومقلب التين حامض في يزيد وجنة حبيبة ضحكت عليهم ههه".. بس كده مش هقول أكتر من كده عن الفيديو ده.

Comments: