١٤ سبب يخلوا الشعر القصير اختيار أفضل

02/09/2020

الشعر القصير دايمًا له جاذبية، في مقابل الهالة الموجودة باستمرار حوالين الشعر الطويل، واللي بتمنع ناس كتير من الإقدام على خطوة قص شعرهم أو بيبقوا عايزين لكن اللي حواليهم رافضين، ولكل هؤلاء عملنا الموضوع ده النهاردة بنقول فيه إيه هي مميزات الشعر القصير؟

1- طبعًا باديء ذي بدء هو شكله مميز، مش مقصود أحلى ولا أوحش من الطويل، لا! هو شكله مختلف دايمًا جذاب للعين عشان مختلف عن المألوف.

2- صحي أكتر لأنك لما بتقصيه بتتخلصي من كل الأطراف الضعيفة والميتة، فحالته بتبقى أفضل وبيتقل.

3- مستحضرات الاعتناء بالشعر كلها هتستخدمي منها كميات أقل، الشامبو والبلسم والمصفف كل حاجة هتقعد أكتر، والأهم إنك لو عوزتي تصبغي شعرك أو تعمليله أي حاجة، هتستخدمي مواد أقل، وده في حد ذاته توفير ميزانية بحالها.

4- مأساة الصيف والحر شعرك مش هيبقى جزء منها، مش هتتحري منه، وفي نفس الوقت مش صعب السيطرة عليه من آثار الشمس والرطوبة.

5- مش قاعدة ثابتة بس ناس كتير الشعر القصير بيخليهم يبانوا أصغر.

6- الاهتمام بيها هيكون أسهل، فهتلاقي نفسك عندك قابلية تغيري فيه، وتفرديه بنفسك، أو تعمليه كيرلي، لأنه مش مرهق زي الشعر الطويل.

7- وطبعًا الاعتناء والتسريح اليومي العادي أسهل كتير.

8- بناء على النقطتين اللي فاتوا، فانتِ مش هتبقي محتاجة وقت كبير عشان تجهزي لو خارجة أو هتستقبلي حد أو حتى مش هتكسلي تظبطيه عشان نفسك بس.

9- بيبقى حلو ومختلف مع أي ستايل، سواء مفرود أو مموج أو مجعد.

10- مش هيبقى وارد إن شعرك يشبك في أي حاجة زي سوستة الشنطة وزراير البلوزة.

11- بينشف بسرعة ودي نقطة في غاية الأهمية!

12- ملامح وشك هتبان أكتر.

13- تجربة قص الشعر صفقة كسبانة في كل الأحوال لأنه حتى لو ما عجبكيش هيطول تاني هيروح فين!

14- في النهاية مش هننسى نقول إنه الموضوع مالوش دعوة بالقوة ولا التحرر ولا رمز اللي قادرة على التحدي والمواجهة ده موضوع عن الشعر عادي!


 

Comments: