بعد Edit صورة زينة: 6 نصايح عشان تعمل Edit لصورك بذكاء من غير ما يبان 

02/09/2020

مش سر إن أغلب الناس بيعملوا Edit لصورهم قبل ما تنزل على السوشيال ميديا، ويمكن الجزء الأكبر من الناس دي هما المشاهير كمان عشان يظبطوا حاجات كتير في الصورة من أول الإضاءة للمكياج لشكل الجسم لأصغر التفاصيل، بس للأسف حتى المشاهير ليهم أوقات لما بيحاولوا يعملوا Edit للصور بتاعتهم بنفسهم بتوضح الغلطات أكتر.

ده اللي شفناه في صور مشاهير كتير على تيك توك وعلى انستجرام لما بيقرروا يظبطوا شكل جسمهم عشان يطلع مثالي فالخلفية اللي وراهم سواء كان سور أو أرض أو خطوط بيبان فيها التعديل اللي حاصل في الجسم وكل ما صورة زي دي بتظهر الناس بتتكلم عنهم على السوشيال ميديا، وكان آخرهم زينة في صورة أخيرة نزلتها على الأكونت الرسمى بتاعها على انستجرام

موقع "stylecaster" قال في مقال من مقالاته إزاي تعمل Edit للصور بذكاء قبل ما تنشرها ومن غير ما يبان إنك عاملها Edit:

1- حمل برنامج Edit كويس:

بالرغم إن فيه برامج كتير عشان الـ Edit بس مش كل البرامج اختيارها كويس في إخفاء العيوب من الجسم أو الوش، فيه برامج بتبقى أحسن في تعديل إضاءة الصور والفلاتر وبرامج لإخفاء العيوب، وده عشان مايبقاش الباب اللي وراك أو الحيطة أو الخلفية عموما مضغوطة أو مفرودة على حسب ما بتعدل في شكل الجسم.

2- ظبط الخلفية:

الغلطات اللي في الصور عشان الـ Edit مشاهير كتير عملوها، حتى مشاهير عالميين كمان، زي كيم كارداشيان وبيونسيه وغيرهم.. خبير الـ Edit "هوارد بينسكي " بيقول لإن المشاكل اللي  في تعديل الصور بتكون دقيقة جدا فإنت محتاج تاخد استراحة ربع ساعة في كل مرة تحس فيها إن فيه مشكلة بس إنت مش عارف إيه هي عشان تصفى عقلك وتقدر تحدد إيه المشكلة تاني بعد كده بسهولة، ولو كنت بتستخدم الفوتوشوب عشان تعمل الـ Edit فالأحسن إنك تقسم الصورة لطبقتين.

3- خلي بالك من الأطراف بتاعتك:

وإنت بتعمل Edit حاول تخلي التعديل يكون عليك إنت بس من غير ما تلمس الخلفية اللي وراك كأنك بتنحت قطعة خشب، فحاول تتجنب الخطوط الغير طبيعية والانتفاخات الغير منطقية.

4- سيب شوية عيوب صغيرين:

مفيش حد جسمه مثالى أو بشرته مثالية ولا حتى الـ Models، عشان كده من الأفضل تسيب شوية عيوب عشان الصورة تبان طبيعية وحقيقية، والناس غالبا ما بيبالغوا في تنعيم بشرتهم ونحت جسمهم فبلاش تخاف تسيب شوية عيوب.

5- صلح المشاكل الواضحة بس:

ماعندكش "سكس باكس" مفيش مشكلة أغلب الناس أصلا ماعندهاش، بلاش تبالغ في الـ Edit عشان تبان مثالي لإن كل ده مش هيبقى منطقي وصلح المشاكل اللي واضحة اللي عملالك إزعاج بس مش لازم تبقى مثالي، زي مثلا تشيل بقعة على الهدوم، تخفي شخص مش عايزة ظاهر في الخلفية، أو تعدل حاجة في شكل جسمك بسيطة بسبب طريقة قعدتك، ماتبالغش عشان كل ما تبالغ كل ما تغلط وحتى المحترفين نفسهم بيغلطوا لما يبالغوا في التعديل.

6- خلي شعرك زي ما هو:

عارفين الشعر اللي بيقدمه برامج الـ Edit بيكون جميل جدا بس بلاش  لإنه بيكون ظاهر وباين جدا، وطبعا بيبقى واضح إن باقي الصورة اتعدلت، فبلاش تعدل الشعر.

Comments: