حاجات تعرف بيها الناس الـ Fake.. إحساسك دايمًا صح!

07/09/2020

الناس المزيفين موجودين في حياتنا باستمرار وبوفرة، وفي الغالب مش بيكون عندك حاجة ملموسة تمسكها ضدهم، ويمكن أحيانًا هما نفسهم مش حاسين بتصرفاتهم وطبيعة شخصيتهم دي، عشان كده عملنا الموضوع ده عشان نقولك إن إحساسك صح، وفيه حاجات لما تبقى موجودة جواك ناحية حد يبقى فعلًا شخص Fake ومش حقيقي ووجوده في حياتك مالوش لزوم!

1- بتحس إنك مش قادر تثق فيه، سواء تقوله أسرار مهمة بالنسبة لك، أو تثق في إنه هيكون موجود لما تحتاجه، ومش ممكن تعتمد عليه.

2- بتبقى متأكد إنه بيتكلم عليك من وراك، أو إن اللي بتحكيهوله مش هيكون حذر في أنه يحكيه لبقية الناس في حياته.

3- كل حاجة بتدور حواليهم، الكلام بيدور حوالين مشاكلهم واحتياجاتهم، ومودهم بيتحكم في إذا كانوا هيبقوا كويسين معاك ولالا النهاردة.

4- دايمًا بتحس إنك مش مرتاح في التعامل معاهم، وإنهم بيعملوا مجهود باستمرار للفت الانتباه لهم.

5- طول الوقت فيه دراما بتحصل، فيه مشاكل وعتاب ومتطلبات، العلاقة مش بتمشي سلسة وعادية زي أي شخص بيتعامل معاك على طبيعته وبتكون قادر تفهمه كويس فما بتحصلش مشاكل.

6- بيخافوا من مقابلة ناس تانيين معاك، زي أصحابك التانيين، اللي ممكن تقارن بينهم وبينك، أو ممكن يشوفوا إنه مش شخص مناسب لصداقتك.

7- بيكدبوا كتير بدون داعي، سواء حاجة خاصة بيك أو بغيرك، لدرجة إنك ممكن تاخدش بالك إنها كدبة لأن مالهاش مبرر، بس بيحبوا الحوارات، وده بيرجعنا لإحساسك، اللي بيبقى ساعتها إنهم مش سالكين!

8- مش بيشجعك تبقى أحسن بالعكس بينبسط لما تبقى في مكانك أو تنزل عنده ويبررلك ده، لكن بتحس بشكل ما إنه مبسوط إنه في وضع أحسن وبيتباهى بده.

9- بينتقدوا كل حاجة بتعملها، بتقولها، بتلبسها، من غير ما يقدمولك اقتراح أفضل، أو يساعدوك تبقى أحسن، بيخلوك دايمًا متوتر ومش راضي عن نفسك ولا واثق فيها!

10- من ناحية تانية لو هما لسه ما بقوش أصحابك بتلاقيهم دايمًا بيبالغوا، يعني تبقى لسه عارفهم تلاقيهم عايزينك تخرجوا وتتكلموا وبيتعامل كأنك شخص غالي عندهم جدًا وانت فعليًا ماتعرفش انت عملت إيه عشان كل ده!

11- بيتكلموا عن نفسه وإنجازاتهم كتير جدًا، ما بيتهموش خالص إذا كنت مهتم أو متفاعل ولالا، وتقريبًا مش بيسمعوا ردك لأن تركيزهم كله على إنهم يتكلموا ومستنيين دورهم عشان يكملوا حكاياتهم.


 

Comments: