أوسكار تعلن عن الشروط الجديدة للترشح لجايزة أفضل فيلم 

09/09/2020

بعد 5 سنين من الجدل عن "OscarsSoWhite" أعلنت أكاديمية فنون وعلوم الصور المتحركة اللي بتوزيع جوايز الأوسكار إن الأفلام اللي هتترشح لجايزة أوسكار أفضل فيلم، لازم تلبي شوية معايير معينة مرتبطة بالتنوع، واشترطت الأكاديمية 4 شروط عشان تعزز التمثيل المتنوع والشامل قدام الكاميرا ووراها.

وقالت الإذاعة البريطانية BBC إن التعديلات والمعايير دي محطوطة عشان يبقى فيه شمولية مايتمش تهميش إبعاد المرأة والأقليات وبعض فئات الجنس المختلفة، ومن غير الشروط دي الفيلم هيبقى غير مؤهل لجايزة أوسكار وده بداية من 2024.

وبالنسبة لحفل توزيع جوايز أوسكار رقم 96 اللي هيتعمل سنة 2025، فأي فيلم هيتأهل فيها محتاج يحقق الشروط دي، وهما:

1- تواجد ممثل واحد على الأقل ويكون رئيسي أو مساعد من جنسية أو عرق مابيظهرش كتير في الأفلام زي: أسيوي، أسباني/ لاتيني، أسود/ أمريكي أفريقي، مواطن أمريكي أصلي، شرق أوسطي، من هاواي أو واحدة من الجزر، أعراق مابتتقدمش بشكل جيد.

2- تواجد على الأقل 30% من الممثلين في الأدوار الثانوية أو أدوار صغيرة للفئات دي: نساء، مثليين، أشخاص ذوي احتياجات خاصة أو صم أو بيواجهوا مشاكل في السمع.

3- السيناريو الرئيسي للفيلم، أو موضوع السرد أساسه بيتكلم عن الفئات دي: النساء، مجموعات عرقية، مثليين، أشخاص ذوي احتياجات خاصة.

4- وممكن للأفلام الترشح في حالة تحقيق شرطين من الـ 4 شروط اللي فوق، وكل القواعد والتعديلات دي هدفها يكون فيه منصة أكبر بتتكلم عن النساء، والأعراق المختلفة، والمثليين، وذوي الاحتياجات الخاصة.

وده بسبب النقد الشديد اللي اتعرضت له جوايز الأوسكار بسبب افتقار التنوع، وفي سنة 2016 ماكنش فيه أي ممثلين من السود أو الأقليات مرشحين لجايزة أوسكار، وقاطع نجوم سينما كبار الحفلة وبدأت تنتشر حركة  "OscarsSoWhite"، ومن ضمن التعديلات اللي عملتها الأكاديمية السنة دي برضه هي دعوة 819 عضو جديد للتصويت على جوايز الأوسكار السنة دي من ضمنهم 45% ستات و36 من غير البيض.

وقالت الأكاديمية إن شروطها الجديدة لجايزة أفضل فيلم غرضها هو تشجيع التمثيل العادل على الشاشة وخارجها عشان السينما تبقى بتعكس الحقيقة ويبقى فيه تنوع لجمهور السينما، وأبرزت النساء والجماعات العرقية وذوي الميول الجنسية المختلفة وذوي الاحتياجات الخاصة من ضمن أهم المجموعات اللي لازم يتم مراعاة تمثيلها.

Comments: