٥ نصايح لتجنب خناقة "كل ده على القهوة ولما ترجع هتنام وتسبني!"

09/09/2020

مع زحمة اليوم الطبيعي اللي بنعيشه واللي أوقاته متقسمه بالعافية عشان الشخص يقدر ينام الـ 8 ساعات، بيبقى صعب جدا الواحد يكرس وقت لشريكه في العلاقة باختلاف مسمى العلاقة سواء مرتبطين أو مخطوبين أو متجوزين.

ولكن أغلب الرجالة خصوصا في مصر هما اللي بيبقوا مشغولين أكتر ومش مديين وقت واهتمام زي الستات، ويمكن ده أغلب الستات بتتكلم عليه على السوشيال ميديا والرجالة كمان ممكن يعملوا ميمز عليه، خصوصا إنهم بعد ما بيخلصوا شغل بيقعدوا على القهوة أو مع صحابهم وقت طويل شوية ويا دوب بيرجعوا البيت وأول ما يحاول يتكلم مع شريكته شوية يروح في النوم من ضغط يومه وتعبه.

وبالتالي ده طبعا بيخلي فيه خناقات ومشاكل في العلاقة بتبقى مستخبية ومش ظاهرة، لإن الست بتعتبر إنها مش واخدة اهتمام قد اللي هي بتديه، وده بيحسسها إن مافيش مساواة بين حجم مشاعرها وحجم مشاعر شريكها.

موقع "psychcentral" قال في مقال من مقالاته شوية نصايح عشان لتجنب أزمات الانشغال دي، وهما:

1- خلي شريكتك رقم 1:

لما الموضوع يبقى متعلق بالأولويات لازم تكون شريكتك رقم 1 في الأولويات دي، في بعض الأوقات الواحد ساعات بينشغل بتفاصيل وضغوطات في يومه وشغله مثلا، وده هيخلي شريكتك يبقى في المرتبة التانية بعد باقي الأولويات، وده بيوصل لها بطريقة ما، لكن لما شريكتك هتحس إنها رقم 1 بالنسبة لك ده هيفرق معاها وهيبقى ليك رصيد كبير عندها.

2-خليها تديك إشارة:

في أوقات كتير بتتخانقوا من غير سبب أو بيكون السبب مش واضح بالنسبة لك، بس السبب الأساسي في الخناقة ممكن يبقى صغير فمايتقالش، عشان كده قبل ما توصلوا للمرحلة بتاعت الخناقات عشان عدم الاهتمام دي اطلب من شريكتك تنبهك أو تديك إشارة وتقولك إنها حاسة بغيابك أو انشغالك أو عدم اهتمامك.

3- حدد وقت معين لشريكتك:

أوقات كتير بتكون فعلا مشغول ويومك مزحوم من غير قهوة أو خروجات أو صحاب، بس  حاول في أي حالة إنت مشغول فيها يبقى فيه ساعة من روتين يومك تقعد تتكلم فيهم مع شريكتك، وبغض النظر عن المواعيد اللي هتريحك بس إنت محتاج تحدد أوقات للأشخاص اللي بتحبها.

4- اتكلم معاها في كل اللي بتفكر فيه:

لو حاسس إنك فعلا قاصد تهرب منها وتهرب من العلاقة ممكن تقولها كده بكل صراحة، أو لو حاسس إن فيه حاجات بتقدر تناقشها مع صحابك في القهوة أو في الشغل أو مع أي حد تاني ومابتقدرش تتكلم معاها حاول تتخطى ده واتكلم مع شريكتك في اللي بيخطر على بالك عنها أو عن حياتك من غير إحراج لإنك لما بتبقى مش صريح معاها ده هيضغطك نفسياً وهتهمشها وبالتالي مش هتبقى مهمة فعلا ولا من أولوياتك.

5- اظهر حبك ليها:

أبسط شيء ممكن أي شخص يقدمه تجاه العلاقة اللي هو فيها إنه يحب شريكه، لإنه بيكون سبب وجودك مع الشخص في الأول، فمفيش مشاكل لما تبين وتظهر لشريكتك إنك بتحبها من غير قيود ولا شروط وتدعمها، عشان تفضل حاسه إنك حتى لو كنت مشغول فلسه بتحبها زي ما إنت، وإن حبك ليها ماتغيرش بانشغالك.

Comments: