في يوم مشاركة الأفكار.. 6 أفكار ما تشاركهمش مع حد!

10/09/2020

العالم بيحتفل النهاردة 10 سبتمبر باليوم العالمي لتبادل الأفكار، وخلينا نقول إن زي ما الكلام والمشاركة بيريحوا، فيه كمان أفكار في دماغك لو شاركتها نتايجها مش هتبقى كويسة أوي! مثلًا زي:

1- لو بنت وبتكراشي على ولد، أو ولد وبتكراش على واحد، ما تحاولش أوي تعلن عن ده قبل ما تتأكد عشان هتبقى تسليتهم في الرايحة والجاية، ونظراتهم وتعليقاتهم ليك أول ما الكراش يظهر هتوديك في داهية وقصتك هتنتهي قبل ما تبدأ!

2- لو في أكتر من شخص حواليك وفكرت تروح تشتري حاجة أو تطلب أكل، مفيش لزوم تسأل لو حد عايز حاجة إلا لو كنت مش جعان أو محب للمحايلة وانتظار القرارات ولم الفلوس وما إلى ذلك من عملية معقدة هيجي فيها الأكل بعد عناء.

3- لو بتعيط أو عيان بحاجة عادية بتحصل لكل الناس مفيش لزوم تشارك أفكارك ومشاعرك دي على السوشيال ميديا عشان هتتوصم بإنك دراما كوين وباحث عن الاهتمام بشكل مفتعل.

4- لو فيه مشكلة إنسانية أو اجتماعية مثارة وفيها ضحايا أو مشاكل ممكن نديها أولوية، مفيش لزوم تشارك العالم وجهات نظرك عن موضوع فرعي تشتت بيه الانتباه حتى لو هتفضل مُصر إنك توضح إنك بتتكلم على موضوع تاني.

5- لو عندك خطة عايز تعملها او خطوة ناوي تقوم بيها، ممكن تبقى من الناس اللي هزيمتهم بتهبط لما بتتكلم وبتحس خلاص إن كفاية الأحلام الحلوة والحكايات اللطيفة.

6- لو جتلك لحظة تجلي وحبيت تعترف بأسرارك وأخطائك وتطلع صورك القديمة ما تعملش كده، دي هتفضل ذلة ممسوكة عليك لفترة طويلة!

Comments: