فوايد إنك تكتب يوميات أو ملحوظات يومية

10/09/2020

مش كل الناس بتحب الكتابة، وفي الواقع مش كل الناس بتعرف تعبر عن نفسها كويس حتى بالكلام، ده بيخليهم ما يفكروش قد إيه الكتابة ممكن تفرق معاهم أو إنها ممكن تحل مشكلة في وقت ما، أو تبقى مجال كبير للتنفيس!

حاليًا الأمور بقة أسهل، انت مش محتاج تجيب نوتة، ولا تقعد في حتة تكتب على ورق، موبايلك ممكن يبقى كافي جدًا، سواء بأبلكيشن النوتس/ أو الملحوظات اللي بيجي مع الموبايل أو إنك تنزل أبلكيشن متخصص بالمواصفات اللي انت عايزها.

كل ده ليه؟ عشان الكتابة ممكن تفرق معاك في حاجات كتير زي:

1- لو عندك مشاعر كويسة أو وحشة ناحية حد ومفيش فرصة إنك تقولها، ومش عارف تحكيها لحد، طلع موبايلك اكتب كل اللي دماغك، وشوف ده هيريحك قد إيه!

2- مهما كان كلامك ملغبط أو مش منظم وماحدش هيفهمه أو انت ماعندكش استعداد تدخل حد معاك في قصتك، تقدر تكتب أفكار ملغبطة ماحدش فاهمها غير وهتحس إنك فضفضت، وممكن لما تطلع الأفكار بالشكل ده تلاقيها الأمور اترتبت في دماغك.

3- النوتة عمرها ما هتشتكي منك لو فضلت تكرر نفس الموضوع مليون مرة، ولا انت هتحس بإحراج إنك ضاغط على حد أو مزهقه بالكلام في نفس القصة كل شوية.

4- ساعات ممكن تتخيل نفسك في موقف شبه حاجة شوفتها في فيلم أو مسلسل قبل كده، ممكن تجرب تجيب الصورة اللي بالك وتحطها جنب الكلام، هتحس بإحساس لطيف إنك جمعت خيالك جنب بعضه.

5- عارف لما يبقى عندك فكرة ساذجة تبقى هتموت وتقولها وتستسخف نفسك أول ما تعمل كده؟ ده ممكن تختصره بإنك تكتب الفكرة دي والصوت اللي دماغك حرفيًا يسكت من غير ما تحط نفسك في موقف محرج.

6- لو انت بالفعل من محبي الكتابة، ده هيطور كتير من قدراتك على التعبير وحصيلة الألفاظ والأفكار اللي عندك.

7- لو فيه ذكرى حلوة أو وحشة مش عايز تنساها، يوم جميل ممكن توثقه بتفاصيله أو بشكل مختصر، يوم وحش او تصرف متهور زي مثلًا رجعت تكلم الإكس وهو مش مهتم، فهيبقى جميل لو كتبت ده عشان تشوفه كل ما تفكر تكرر التصرف الأحمق ده تاني!

8- هيزود ثقتك نفسك، لما يبقى فيه مساحة تتكلم فيها عن نفسك بشكل متناسق، وتحكي حكاياتك وتشوف من برة إنك اتصرفت بشكل كويس، أو إنك غلطت وتدرك ده، هتبقى أنضج عاطفيًا وإنسانيًا.

9- هيحسن قدراتك على التواصل مع الناس، الكتابة هتحسن قدرتك على التعبير وفهمك لنفسك وده هيخليك تتقدر تتواصل وتتعامل أحسن مع الناس.

Comments: