١٠ مبررات منطقية تقدر تستخدمها حجة عشان ماتروقش أوضتك

10/09/2020

مهما حاول الشخص اللي مابيحبش يروق أوضته هو ليه مابيحبش هو ليه مابيحبش يروقها، مش هيلاقي كلام يوصف المبررات اللي بيحس بيها، وعلى ما الموضوع بيسبب للشخص اللي بيحب يبهدل أوضته إزعاج من كلام الناس اللي بيزوروه أو كلام ست الحبايب إلا إنه بيقدر يستحمل الكلام ده عن إن الأوضة تبقى متروقة وحلوة والسرير متطبق والملاية مفروشة صح، وكل القواعد الجميلة لتنضيف الأوضة دي، وطالما مابيأذيش حد بكركبة الأوضة دي خلاص هو في أمان مع نفسه.

وبمناسبة يوم ترويق الأوضة، خلينا نقولك شوية أسباب بتخلي الشخص يحب اوضته تبقى مش متروقة وفوضوية حسب موقع "bustle":

1- مش هيضيع منك حاجة:

إنت عندك فكرة عامة عن أماكن الحاجات بتبقى فين، يا دوب بتسأل نفسك هو أنا ممكن أكون رميت المفاتيح فين؟ وهترد بكل سهولة اه رميتها امبارح أول ما دخلت رميته على السرير فأكيد وقع بين السرير والحيطة.

2- عندك وقت لحاجات مهمة أكتر:

عندك فكرة عن حجم الوقت اللي الشخص بيضيعه عشان يروق الأوضة ويعمل كل التفاصيل اللي قولناها فوق دي؟ والمشكلة إن كل ده هيبوظ تاني وهيبهدل الأوضة تاني، فممكن تعمل حاجة مفيدة أكتر في الوقت اللي هتضيعه في الترويق ده زي إنك تعمل أكل مثلا أو تتفرج على مسلسل ولا فيلم.

3- هتعرف مين اللي بيحبك بجد:

هتعرف مدى حب أهلك ليك وتقبلهم ليك، أو حتى صحابك لما يجولك، هتعرف مين بيحبك وبيحب يقعد معاك زي ما إنت مش محتاج تروق الأوضة وتقلب الدنيا عشان خاطر حب حد ولا حد يقعد معاك.

4- هتبقى مبدع أكتر من اللي بيحبوا النظام:

فيه دراسة عملتها الجمعية الأمريكية لعلم النفس بتقول إن في الوقت اللي الأشخاص اللي عندهم أوض مترتبة ومتروقة كانوا قادرين يوصلوا لنفس العدد من حلول المشاكل اللي طرحوها عليهم وعلى الأشخاص اللي بيحبوا الأوض مبهدلة، الأشخاص الغير منظمين كانت حلولهم مبدعة أكتر بشكل ملحوظ.

5- هتقدر اللي عندك:

كل حاجة هتبقى قدامك، فالبتالي هتقدر اللي موجود قدامك حتى لو كانت غير مرغوب فيها والمفروض ترميها بس هتعجبك وهتقدرها، غير لما تلمها كلها وتحطها في الأدراج والدواليب كأنهم مسجونين.

6- هتخلي الناس اللي بيحبوا النظام يحمدوا ربنا:

أول ما حد من محبيين النظام والترويق يدخل أوضتك هيحمد ربنا إنه مش الشخص ده، بغض النظر عن إنه مش حاسس بالنعمة اللي إنت فيها، بس سيبه يتظاهر ويحس إنه في حالة أفضل.

7- هتستمتع بالمفاجأت:

هتتفاجئ كتير بالفلوس اللي مرمية في الأوضة أو في هدومك، وهتتفاجئ إنك تلاقي حاجات كنت ناسيها كتير.

8- مفيش حد هيطلب يستلف حاجة منك:

في الغالب الناس هتبقى فاكرة إن الشخص اللي مابيروقش أوضته مش نضيف أو مابيغلسش هدومه مثلا، أو عارفين إن الهدوم كانت ممكن تبقى فوق التلاجة أو تحت السرير.

9- محدش هيسرقك:

محدش يعرف أماكن الحاجة، ومحدش عارف ممكن يتغلب إزاي على الكركبة والفوضى دي، وعقبال ما يوصل لحاجة في كل جبال الفوضى دي يكون البوليس وصل.

10- هتبقى جزء من الطبيعة:

أكيد مفيش حيوانات بتطلب من ولادها في الغابات إنهم ينضفوا أوضهم، عشان كده هتحس إنك جزء من الطبيعة وهتثبت للناس إنك محب للطبيعة الأم.

Comments: