١١ سبب يخلوك تتمسك بصديقك القديم: صندوقك الأسود وعارف كل مصايبك

15/09/2020

مهما لفيت وعرفت ناس جديدة وعملت صداقات هتفضل الصداقات اللي بتعيش بالسنين هي الصداقات الأقرب لقلبك أو هتفضل تشدك حتى لو كل واحد فيكوا اختلف وبقى بشخصية وطريقة حياة مختلفة، ومهما كانت الخناقات بينكوا بتطول أو بتبقى كبيرة في أوقات هتفضل السنين والعشرة والمواقف بتشدكوا لبعض.

يوم 17 سبتمبر هو يوم الصديق القديم، وعشان كل واحد في حياته فيه صديق قديم خلينا نقولك ليه ماينفعش تفرط في صاحبك القديم زي ما قال موقع "good housekeeping" في واحد من مقالاته:

1- صاحبك القديم شاف كل أزياءك اللي كانت غريبة وصعب إن حد يتقبلها غيره، عشان كده مش لازم تفضل طول الوقت تمثل وتفرض شخصية مش بتاعتك في لبسك أو شكلك أو إنك مولود بأناقتك، ويمكن شافك كمان بهدوم المدرسة وإنتوا قاعدين مبهدلين مع بعض.

2- هتقدر تكلمه عن أي حد في حياتك ومش لازم تحكي حكاية الشخص من الأول، عشان كده كده هو عنده خلفية كويسة من الأول فإنت يادوب بتحكي الموقف مش مضطر تحكي قصة حياتك.

3- بيحب عيلتك ن غير قيود أو شروط، يمكن زي أهلك وبيبقى واحد من العيلة، والعيلة كلها عارفاه، وه بيقى فيه ميزة كمان إن لو عندك خلافات مع أهلكهيقولك رأيه بمنتهى الحيادية ومش هيقسى على طرف فيكوا وممكن يبادر بحل المشكلة، ولو متجوز ومخلف ولادك هيبقوا زي ولاده وهيبقى شايف فيهم ذكرياتكوا وإنت صغيرين.

4- حتى لو كنتوا في بلاد مختلفة عن وفيه فرق توقيت مش مهم الوقت اللي هتكلمه فيه، مش هيتضايق إنه صحي من النوم عشان يسمعك، ولو ماقدرش هيقولك إنه نايم اتصل بكره الصبح أو لما اصحى هكلمك وهتلاقي نفسك برضه مش متضايق من رد فعله.

5- مش محتاج تبذل مجهود كبير عشان تحافظ على الصداقة دي، بعكس الأصدقاء الجداد اللي بيحتاجوا منك إنك تشوفهم باستمرار وتتصل دايما عشان تتطمن عليهم أو تبقى بتطمن عليهم، بس صحابك القدام مهما طال الوقت اللي مابتسألوش على بعض فيه أو مابتشفوش بعض مش هيزعل ويتقمص منك.

6- حافظك كويس وبيعرف يخليك تضحك مهما كنت في أسوأ أوقاتك.

7- ممكن تتصل بيه مخصوص أو تقعد معاه قعدة نم كاملة كل الكلام بيدور فيها عن صحابكوا بتوع المدرسة بيعملوا إيه على الفيسبوك وحياتهم بقيت عاملة إزاي، وكل ما تكبروا في السن كل ما النم هيبقى ممتع أكتر وهتقول اللي نفسك فيه على الناس بأريحية أكتر.

8- في الغالب أهلك كمان هيبقوا عارفين بعض، وخصوصا الأمهات، وده معناه إن كل واحد فيكوا هيبقى عنده أخبار التاني وبيته وشكل حياته بالتفصيل كل أسبوع على الأقل.

9- صديقك ده هيخليك تحس بقيمة نفسك، حتى لو في وقتك ما قررت تتكلم عن نفسك بغرور أو بعظمة هيمشي معاك للأخر ومش هيعترض على أي حاجة من اللي بتقولها، وبالرغم من كده هو صريح معاك ولو لقاك غلطان أو في موقف مش كويس ليك هيقولك بينك وبينه.

10- مش محتاج تحب نفس الحاجات اللي بيحبها عشان علاقتكوا تستمر، والعلاقة بينكوا أقوى من كده فمش لازم تحبوا نفس نوع المزيكا ولا تبقوا بتشتغلوا في نفس المجال.

11- معاهم صندوق ذكرياتك، وممكن الليلة اللي بيقضوها معاك تبقى كلها عبارة عن فاكر لما عملنا وفاكر لما روحنا، ويمكن إنت دلوقتي سنك ولياقتك بقوا مابيسمحوش بالذكريات دي بس هما عارفين كل حاجة عنك.







 

Comments: