٧ ألوان تلبسهم وإنت رايح انترفيو شغل!

24/09/2020

دايمًا الواحد بيبقى محتار يلبس إيه لو جاله انترفيو شغل والموضوع بياخد وقت وتفكير ومجهود.. أنت أولى بيه يعني تنام
شوية أو تذاكر كده قبل الانترفيو، أو تشرب كوباية شاي ولا قهوة

في استطلاع رأي عمله موقع "Resume.io"  بعد سؤال 2786 شخص عن الألوان التي اختاروها يوم الانترفيو، وتحليل الإجابات من مدرب الحياة الوظيفية في المملكة المتحدة ومتخصص علم النفس البيئي ومدرب الرفاهية"لي تشامبرز" واللي قال  "إن كل لون من الألوان له آثار نفسية ويكشف عن شيء من شخصيتنا بدلالات إيجابية وسلبية، ويمكن أن يعمل هذا في مصلحتنا عندما نفكر في طبيعة الوظيفة والقطاع الذي نحاول أن نكون ناجحين فيه"
الألوان بالترتيب هي
1- الأزرق

81% من المشاركين أختاروا اللون الأزرق،  وهو اختيار مثالي لأنه بيدي انطباعا بالهدوء والثقة بالنفس والسلطة وأيضا الراحة النفسية، وبالتالي بيعزز فرص القبول في الوظيفة.

2- البنفسجي

اختار 72% من المشاركين في الاستطلاع واللي اتقبلوا في الوظايف اللي قدموا عليها" اللون البنفسجي أو الموف"، لأنه بيدي  انطباع بتمتع الشخص بالجاذبية والجرأة والإبداع وقوة الشخصية.

3-الأسود

تم اختيار 69٪ من المشاركين  وهم لابسين أسود، لأنه لون بيمثل صفات القيادة والأناقة والجدية، بس مع ذلك أحيانًا الأسود بيدي انطباع عن الشخص إنه غير جدير بالثقة ويعتبر مصدر تهديد.

4- الأخضر

تم تعيين 56٪ من المشاركين اللي اختاروا اللون الأخضر اللي بيعبر عن النمو والصفاء، ويشير إلى أن الشخص منفتح على التدريب والتعلم، هادئ الطباع وغير حاد، ولكنه شخص  قليل الأبداع.

5- الأحمر

تم تعيين 48% من المشاركين لما اختاروا اللون الأحمر في الانترفيو، والأحمر بيدي انطباع عن الشخص إنه نشيط وحيوي واجتماعي، لكن عند بعض الناس بيقى اختيار غريب وبيقلل فرص إن الشخص ده يتم قبوله.

6 و 7- الأصفر والبرتقالي

اللونين دول في العادي بيدوا انطباع عن الشخص إنه محب للحياة، ولكن  في انترفيو شغل اللونين مرتبطين بشكل عام بنقص الجدية والالتزام، عشان كده من الأحسن إنك تلبسهم بعد التعيين مش في الانترفيو.

 بص إنت هتعمل اللي عليك وهتختار اللون المناسب.. بس الأهم من اللون إنك تبقى هادي ومذاكر كويس وتبقى مناسب للوظيفة اللي إنت مقدم عليها.. عشان اللون لوحده مش هينفعك!

Comments: