اختبارات فيروس كورونا هيبان نتيجتها في 30 دقيقة هتنتشر في كل دول العالم

29/09/2020

من الخطط اللي عملاها منظمة الصحة العالمية هي إن يتم نشر ملايين من تحاليل فيروس كورونا الفوري في العالم كله، التحليل ده  بيطلع نتيجة المسحة في دقايق ويعتبر علامة مميزة خطوة بارزة لمحاربة فيروس كورونا في العالم.

جريدة "دايلي ميل" قالت إن التحاليل السريعة دي هتاخد وقت من 15 لـ 30 دقيقة عشان تشخص حالة المريض إنه إيجابي أو سلبي وبتكون زي اختبارات الحمل بتعرض خطين باللون الأزرق لما يبقى الشخص حامل للفيروس وإيجابي، وبيتم استخدامه عن طريق مسحة من المناخير ولو الشخص حامل للفيروس بتاخد البروتينات والأجسام المضادة الموجودة على سطح الفيروس، وإن كان ده بيعتبر أقل دقة ولكنها طريقة أسرع بكتير.

اللي بيتم استخدامه حاليا في معظم دول العالم هو تحليل الـ PCR  وهو بيكون اختبارات جينية عالية الجودة ولكن بتطلب معالجة بمعدات معملية ومواد كيميائية عشان كده بياخد وقت، لكن الدول الفقيرة لسه لحد دلوقتي مش قادرة تستخدم تحليل الـ PCR بشكل كبير وده مسب مخاوف كتير من انتشار الفيروس في أفريقيا ودول جنوب شرق آسيا وأمريكا الجنوبية، لإن عدد تحاليل الـ PCR في أوروبا بيوصل لـ 100 ألف تحليل في اليوم في أمريكا الجنوبية بيوصل لـ 395 تحليل وفي أفريقيا أقل من 16.

واتفقت شركة الأدوية الأمريكية "Abbott" وشركة الأدوية الكورية "SD" على تزويد 133 دولة نامية والاختبارات والتحاليل دي بسعر قليل وهو 3.80 جنيه استرليني أو ما يعادل 5 دولار لكل مجموعة، وقالت منظمة الصحة العالمية ومؤسسة "بيل وميليسا جيتس" إن المشروع اللي تكلفته هتكون 467 مليون جنيه إسترليني أو 600 مليون دولار ممكن يبدأ في أول الشهر الجاي، وقالوا كمان إن الاختبارات دي هتكون في الدول الغنية كمان لكن برسوم أعلى وألماتيا فعلا طلبت 20 مليون اختبار وفرنسا وسويسرا هيمشوا على خطاها.

لكن في بريطانيا غير واضح هما على استعداد لشرا الاختبارات الجديدة ولا لا بالرغم من مشروع رئيس الوزراء جونسون في لعمل 10 مليون تحليل يومياً، لكن حاليا الحكومة البريطانية بتستخدم تحليل عن طريق البصق، واختبار الأجسام المضادة السريعة لكن الأتنين بياخدوا حوالي ساعة ونص.

وقالت شركة الأدوية الأمريكية "Abbott" وشركة الأدوية الكورية "SD" إن التحليل السريع ده بيدي نتيجة دقيقة بنسبة 97% في الظروف المثالية، ولكن يعتقد إن نسبة صحتهم بتتراوح بين 80% لـ 90% ولكن ميزته هو إنه هيساعد كتير من الدول الفقيرة وهيحدد عدد أكبر من الأشخاص المصابين وهيساعد في عزلهم وده هيوقف انتشار الفيروس.

ويعتبر تحليل الـ PCR من أكتر التحاليل الدقيقة واللي بتدي نتيجة صح لكن بيتم تشخصيها تشخيص حقيقي لـ 70% من الحالات.

Comments: