اختراع إنزيم جديد بيحلل البلاستيك 6 مرات أسرع من قبل كده 

30/09/2020

السنين اللي فاتت أغلب النشطاء في العالم كله كانوا بيواجهوا أزمة البلاستيك وبيناشدوا الناس يقللوا استخدام البلاستيك لإنه بيسبب تلوث للمحيطات والبحار وبيضر بالكائنات البحرية والأسماك، وعلى الجانب الآخر العلماء والباحثين فكروا إزاي البلاستيك ممكن يدوب أسرع عشان مايعملش أزمات للبيئة.

واخترعوا إنزيمات بيحلل البلاستيك 6 مرات أسرع  في الازايز البلاستيك والهدوم المختلطة عشان يتم إعادة تدويرهم، والإنزيم اللي تم اختراعه هو عبارة عن خلط إنزيمين منفصلين تم العثور عليهم في حشرات بتاكل البلاستيك في موقع نفايات في اليابان في 2016.

وبعد سنتين من الاكتشاف الأول، كشف العلماء والباحثين عن نسخة مصممة هندسياً من أول إنزيم كان قادر على تكسير البلاستيك في ظرف أيام قليلة، وقالوا إن بنية الإنزيم "PETase" تقدر تهاجم الأسطح الصلبة البلورية في الازايز البلاستيك، وإن النسخة المتحولة منه بتشتغل أسرع بنسبة 20%.

وحللت الدراسة الأخيرة اللي اتنشرت في مجلة "Proceedings of the National Academy of Sciences" الإنزيم التاني اللي بيضاعف سرعة تكسير المجموعات الكيميائية اللي بيسببها الإنزيم الأول، وقالت إن لما تم الجمع بين الانزيمين شاف العلماء إن الزيادة التانية في السرعة كانت 3 أضعاف، وده يعني إن تكسير البلاستيك كان أسرع 6 مرات لما تم إضافة إنزيم "PETase".

وقال البروفيسور "جون ماكجيهان" من جامعة بورتسموث في بريطانيا لجريدة الجارديان "بشكل غير متوقع لما تم ربط الإنزيمات مع بعض حصلوا على زيادة كبيرة في النشاط، وده مسار جديد لمحاولة صنع الإنزيمات أسرع وأكتر صلة بالصناعة، ودي تعتبر واحدة من القصص اللي بنتعلم فيها من الطبيعة وندخلها المعمل".

اختراع الإنزيم ده ممكن يبقى طفرة كبيرة لمكافحة التلوث البيئي الناتج عن البلاستيك وهو مشكلة عالمية، لإن البلاستيك بيشوه الطبيعة والمحيطات ومعروف دلوقتي إن البشر بيستهلكوا كمية كبيرة من البلاستيك وجزيئات البلاستيك الدقيقة، ويمكن من الصعب حالياً تفكيك الازايز البلاستيك لمكونات كيميائية يتم إعادة تدويرها.

وقال "جون ماكجيهان"إن عن طريق التعاون مع الشركات التانية المنتجة للإنزيم زي الشركة الفرنسية "Carbios " وعن طريق الأساليب المختلفة في التعامل مع الإنزيم ممكن يبقى جاهز للاستخدام التجاري في خلال سنة أو سنتين، وفريق البحث في جامعة "بورتسموث" و4 مؤسسات أمريكية بيدرس دلوقتي إزاي يتم تعديل الإنزيمات عشان تشتغل بشكل أسرع كمان.

واتكلم العلماء كمان مع شركات الملابس الكبرى اللي بتنتج أقمشة مختلطة من البوليستر والقطن عن إمكانية تكييف الإنزيم لإعادة تدوير الملابس المختلطة، واللي ممكن يتعمل من خلال دمج الإنزيمات الموجودة اللي بتشتغل على تكسير البلاستيك.


 

Comments: