١٠ علامات هينبهوك إنك بدأت تكبر 

04/10/2020

من سن الـ 25 وانت طالع، ما تقدرش تقول على نفسك بالأرقام إنك كبرت، ويمكن الفكرة نفسها ماتجيش في بالك إلا لما تظهر شوية علامات كده تفاجئك، تغيرات في حياتك وتفكيرك وتصرفاتك والأحداث اللي بتحصل حواليك واللي مجبر تتعامل معاها، تخليك تحس إنك بدأت تتاخد على خوانة وتبقى مضطر تفكر "إيه ده أنا كبرت ولا إيه؟!"

خلينا نقول إن مش كل الكبر نضج، مش كل الناس لما سنها بيكبر بيتأثروا بتجاربهم وبيسمحولها تغير حاجة فيهم، فهنا هنتكلم عن شوية علامات هتحسسك إنك كبرت وفيه منها مرتبط بإنك تبقى بتنضج مش بس عمرك بيزيد.. وده على سبيل المثال وليس الحصر!

1- مبدئيًا، في لحظة كده هتكتشف إن كل حاجة لو انت ما عملتهاش ماحدش هيعملها! لو ما نضفتش البيت مش هينضف، لو ما طلعتش أكل من الفريزر مش هتاكل، لو ما دفعتش الفواتير الخدمات هتقطع، لو ما قررتش بنفسك تدور على دكتور وتروحله ماحدش هيوديك، لو ما اشتغلتش مش هيبقى فيه فلوس...إلخ من الأمثلة الكتير طبقًا لشكل حياة كل واحد.

2- طاقتك للفرهدة زي إنك تطبق يومين تلاتة، أو تخرج كل يوم خروجة عايزة مجهود أكتر من القاعدة على القهوة ساعتين ترغي، ما بقيتش موجودة أوي، وميلك إنك تروح ترتاح عشان تقدر تقوم للشغل بيبقى أكتر.

3- قعدة البيت هتبدأ تبقى بتمثلك حاجة، ومش هتبقى ضدها تمامًا زي الأول، بالعكس هتبقى في الغالب عايز تروح في معاد معقول، تاكل وتتفرج على حاجة وحلو أوي كده!

4- هتبدأ تخرج شوية من إطار الأحلام الشاطحة الكبيرة وتنزل على أرض الواقع، توقعاتك من شغلك وأهلك وأصحابك وحياتك، هتبقى واقعية أكتر من الأول، هتبدأ تعرف عن ظهر قلب إن مش كل حاجة زي الأفلام وإيه اللي المفروض تنتظره من الناس اللي حواليك.

5- في نفس السياق برضه حياتك العاطفية هتكتشف إن الأمور مش بتمشي زي الأفلام، وإن الأحلام الكبيرة اللي كنت فاكرها مناسبة ليك، فيه حاجات أبسط منها ممكن تخليك أسعد، بجانب إن معاييرك في الاختيار كلها هتتغير وهتبقى واقعية أكتر، وهتلاقي إن المشاكل في الحياة مش التضحيات والمشاعر المشتعلة زي الأغاني، لكن إزاي نتفاهم ونقبل بعض.

6- جهازك الهضمي هيبدأ ياخد مسار مختلف، مش أي حاجة ممكن تتاكل أي وقت، ولا أي لغبطة أكل من الشرق والغرب ممكن تتاكل ورا بعض، كل حاجة هيبقالها عواقب وخيمة من صعوبة الهضم واعتراضات القولون!

7- نقطة حزينة لكن للأسف لازم نواجهها، وهي أخبار الموت والمرض اللي هتبقى محيطة بيك مش كحدث عارض، لكن كشيء عادي ممكن يحصل أي وقت، ولأي حد قريب منك.

8- الويك إيند مش دايمًا هيبقى فرصة للانطلاق، كتير هتبقى عايز تقعد في البيت ترتاح، ولو عايش لوحدك، هيبقى فارق معاك جدًا إنك تقعد تخلص شغل البيت المتراكم زي التنضيف وغسيل الأسبوع.

9- مفهومك لحب وتقدير عيلتك هيختلف، هتبقى اخدت خلاص قدر الحرية اللي كان نفسك فيه وانت أصغر من كده، وشوفت حاجات في الدنيا عرفتك برضه إن أهلك مهما كانت عيوبهم وجودهم مهم في حياتك، فبتختار بإرادتك إنك تقعد وتقضي وقت معاهم.

10- هتتصالح مع الفقد والرفض وإنك مش هتاخد كل حاجة عايزها، وهتتآلف مع وجود المشاعر دي كرفيق دائم في حياتك.

Comments: