١٣ سبب هيأكدولك إن الخريف مش أحلي فصول السنة زي ما إنت فاكر 

07/10/2020

مع نهاية شهر سبتمبر وبداية أكتوبر بيبدأ الجو يتغير وبيبقى فيه نسمة هوا والرطوبة بتقل وريحة الجو بتتغير خالص ودي بتبقى أهم علامة على دخلة الخريف، وبالتالي الواحد بيدخل في موود إنه يسمع أغاني فيروز شوية خصوصا لو بتذكرك بالخريف، أو يكتئب شوية أاو يحس إنه عايز يصاحب ويرتبط دلوقتي حالاً عشان يقضي الشتا مع شريك له.

ويمكن فصل الخريف من أكتر الفصول المحبوبة بالنسبة لعدد كبير من الناس، عشان الجو واختيارات الخروجات الأكتر، بس فيه حاجات إنت مابتبقاش واخد بالك منها في الخريف بتخليه مش أحلى فصل ولا حاجة زي ما إنت متخيل.. خلينا نقولك إيه أوحش حاجات بتحصل في فصل الخريف واللي بتخلي فيه ناس واخدة الجانب الآخر في إنهم مابتحبهوش:

1- في فصل الخريف بتدرك إن المايوه اللي جبته ومالحقتش تلبسه وتتبسط بيه لازم تشيله خلاص للسنة الجاية، والتان اللي كنت فرحان بيه آن الأوان عشان تداريه.

2- بتودع كل الصنادل الجميلة اللي جبتها عشان تطلع "البوتات" والجواكيت

3- هضطر تشتري هدوم شتوي جديدة من أم 15 آلف جنيه للجاكيت عشان تبقى ماشي مع الموضة، وعشان شرطة الموضة اللي بيظهروا في أول كل موسم.

4- المدارس بتدخل والزحمة بتبدأ والأطفال بيملوا الشوارع الصبح وآخر النهار، ده غير "شوبينج" المدارس اللي بيطلع عين كل أسرة.

5- لو نمت بليل وفتحت التكييف أو المروحة هتسقع، ولو اتغطيت هتتحر، ولو سبت الشباك مفتوح هتسقع، بس لو قفلته هتتحر.

6- أوراق الشجر لونها بيتغير لبني وبتبدأ تقع وبتبهدل الجناين والشوارع وبالرغم من جمال شكلها إلا إنها لما تقع على رأسك وشعرك مش هتبقى بنفس الحلاوة خالص.

7- يادوب بتخلص شغل بتلاقي الدنيا ليليت والشمس غابت، مابتلحقش تشوف الشغل إلا وإنت رايح الشغل وفي الإجازات والأعياد الرسمية ده لو صحيت بدري.

8- الصبح بيبقى حر أوي وبليل ساقعة أوي، ولازم تسمع كلام ماما وتنزل معاك جاكيت خفيف في إيدك ولو ماسمعتش كلامها هتسقع وتروح من أول الخروجة أو هتستلف جواكيت أو هيجيلك برد.

9- في المرحلة دي من السنة دولابك بيبقى "ميكس" بين اللبس الصيفي والشتوي، ماتقدرش تطلع الصيفي عشان الجو ممكن يقلب ويحرر في أي وقت، وكل يوم والتاني هتلاقي نفسك بتطلع قطعة شتوي عشان بليل وإنت راجع.

10- مابتبقاش عارف في الوقت ده ممكن تاخد دش بمياه ساقعة ولا بمياه سخنة.

11- هتبدأ تشتري منتجات العناية بالبشرة عشان شفايفك هتشقق ولازم تستخدم زبدة كاكو، أو كريمات عشان ايدك ورجلك السقعة هتخليهم محتاجين مرطبات.

12- القشعرة اللي بتحصل في جسمك في كل مرة هتحس فيها بشوية برد من غير ما تكون لابس تقيل.

13- هتواجه اكتئاب تغيير الفصول اللي بيبقى له أسباب كتير منها نقص عدد ساعات الشمس اللي هتخليك تحس إنك عايز تقعد في البيت وماتردش على حد من صحابك وتتفرج على أفلام ومسلسلات بس. 

Comments: