اعرف إيه الأسباب اللي بتخلي حد يأذي الأطفال.. وإيه علامات العنف الأسري على الطفل 

11/10/2020

انتشر الفترة اللي فاتت كذا قضية عن أطفال بتسيب بيت أهلها وبيهربوا وده بسبب المعاملة السيئة ليهم، وكان آخرهم البنت اللي هربت ولما لقوها قالت إن أهلها ضربوها فسابت البيت، وبعدها اتفتحت قضية تعنيف أو ضرب الأطفال وانقسمت الأراء فيها، جزء من الناس كانوا شايفين إن ده شئ غير مسموح بيه وإنه فعل غير إنساني، والجزء التاني كان شايف إن ده شئ طبيعي في التربية وإنهم اتضربوا وهما صغيرين فعادي يضربوا ولادهم عشان يعملوهم ويربوهم.

تطبيع ضرب وإساءة الأطفال أو التعامل معاه بشكل عادي ممكن هو شئ مش جديد وللأسف مفيش إجابة واضحة بعنيها بتوضح إيه السبب ورا آذى الأطفال، ويمكن المشاكل المسببة لآذى الأطفال بتبقى أكبر وأصعب من ضرب أو آذى الأطفال، ولكن موقع "health line" قال في واحد من مقالاته الأسباب اللي بتخلي شخص بالغ يأذى الأطفال وهما:

1- إن الشخص يبقى عنده تاريخ من التعرض للإساءة وهو طفل أو اتضرب أو تم إهماله بشكل ما وده بيبقى زي جملة بنسمعها كتير وهي "ما كلنا اتضربنا واحنا صغيرين وطلعنا زي الفل أهو".

2- الشخص يبقى بيعاني من اضطراب أو بيتعاطى المخدرات.

3- المشاكل الجسدية أو مشاكل الصحة النفسية أو المشاكل العقلية أو الاكتئاب والقلق أو اضطراب ما بعد الصدمة.

4- العلاقات السيئة بين الطفل وأهله.

5- الإجهاد الاجتماعي والاقتصادي الناتج من المشاكل المادية والبطالة والمشاكل الطبية.

6- عدم فهم أساسيات تنمية الطفولة وطبيعة الطفل والتوقع إنه يقوم بمهام أكبر من سنه أو قبل ما يبقى مستعد ليها.

7- نقص مهارات الأمومة والأبوة في التعامل مع ضغوطات وصراعات تربية الأطفال.

8- نقص الدعم من المجتمع والأسرة والأصدقاء.

9- الضغوطات العائلية والأزمات الناتجة عن العنف المنزلي واضطراب العلاقات والانفصال والطلاق.

10- مشاكل الصحة العقلية الشخصية زي عدم الثقة في النفس والإحساس بعدم الكفاءة والخجل.

العنف الأسري على الأطفال بيبان عليهم أو بيظهر عليهم بعض الإشارات حتى لو مش عايش معاهم ممكن تعرف عن طريق العلامات دي وهما:

1- تغييرات في السلوك وزيادة العدوانية والغضب وفرط النشاط.

2- الرغبة في ترك الأنشطة المهمة بالنسبة للطفل زي المدرسة أو الرياضة.

3- محاولات الهروب أو إنهم يسيبوا البيت ويمشوا.

4- تغيير الأداء في الدراسة أو في المدرسة بالتحديد والغياب المتكرر

5- الانسحاب من الصحاب والعيلة

6- محاولات إيذاء النفس والانتحار 

الجدير بالذكر إن العنف الأسري ضد الأطفال له أشكال متعددة ومختلفة وهما:

1- الآذى الجسدي أو الضرب أو أي آذى بيسبب ضرر جسدي 

2- الاعتداء الجنسي زي التحرش أو الاغتصاب 

3- الإساءة العاطفية أو التحقير من قيمة شئ عمله أو حجب الاتصال العاطفي أو الزعيق 

4- الإساءة الطبية بمعنى الحرمان من العلاج والخدمات الطبية اللازمة أو تأليف قصص خيالية عن تعرض الشخص لأذى.

5- الامتناع عن تقديم الأكل والرعاية والمأوى للطفل والضروريات الأساسية .

عموما لو إنت شخص بالغ وشوفت أي حالة من العنف الأسري ضد الأطفال في مصر أو لو إنت طفل ومحتاج تدخل لحد ينقذك من العنف الأسري في مصر فخلينا فممكن تكلم المجلس القومي للأمومة والطفولة على خط نجدة الطفل ورقمه هو 16000، وفيه خ تاني هو خط المشورة الطبية للأباء والأمهات 16021، وفيه خط كمان خاص بالأطفال ذوي الإعاقة 08008886666 

Comments: