إيه هو الـ Emotional Eating.. وإزاي تقدر تتحكم فيه ؟

13/10/2020

ما بتحس بتوتر أو حاجة ضايقتك أو عصبتك.. أو لو فرحان وعايز تحتفل .. بتلاقي نفسك بتجري تتطلب أكل أو حاجة حلوة على طول.. بغض النظر عن كونك جعان او لأ، لو ده حصلك أو بيحصلك يبقى ده الـ Emotional Eating
أو "الأكل العاطفي"
واللي معناه الاتجاه للأكل حسب تقلبات مشاعرك وعواطفك مش على أساس الجوع الحقيقي

في حالة المشاعر السلبية زي القلق والحزن أو التوتر بيكون الأكل إلهاء أو تشتيت عن المشاعر دي، أو فرصة للتنفيس عن المشاعر دي بشكل مؤقت، وفي حالة المشاعر الإيجابية زي الفرحة بتحقيق إنجاز أو حدث سعيد بيعتبر الأكل برضه كمكافأة أو إحتفال.. يعني بيتم إستخدامه كمان كأداة للتعبير عن المشاعر

ممكن كمان الـ Emotional Eating يكون سلوك مكتسب من وقت الطفولة، بسبب ربط عقلك بين تحقيقك لأي إنجاز في الدراسة أو احتفالك إنت وأسرتك بأي مناسبة وبين الأكل.. فبشكل لا إرادي عقلك بيربط بين الأكل وبين الشعور بالحنين للسعادة اللي كنت بتحس بيها في اللحظات دي

وطبقًا لمجلة Popular Science
ففي بعض الاختلافات بين الجوع الحقيقي والجوع العاطفي
منها إن الجوع الحقيقي بيحصل بالتدريج وممكن يتم إشباعه بأي نوع من الأكل، وبتكون واعي بالكمية اللي بتاكلها، وبيبقى مصدره معدتك  ومابيسببش أي شعور بالندم أو الذنب بعده

إنما الجوع العاطفي على العكس بيحصل فجأة، وبيتم إشباعه بأكلات معينة وهي اللي بيبقى نفسك فيها في الوقت ده، ومابتكونش واعي للكميات اللي بتاكلها، وبيبقى مصدره عقلك بناء على مشاعرك في وقتها، وبتحس بالندم أو الذنب بعدها

بس إزاي تقدر تسيطر على الأكل العاطفي، في البداية إنت محتاج تدور على وسيلة تانية للتنفيس عن مشاعرك السلبية زي الغضب والقلق أو الاحتفاء بمشاعرك الإيجابية زي الفرح، تنفيذ القرار ده مش سهل هتحتاج وقت ومجهود إنك تلاقي نشاط تاني يحسسك بنفس اللي الأكل بيحسسك بيه زي إنك تخرج مع شخص بتحبه وتثق فيه أو تشوف فيلم أو تسمع موسيقى، ممارسة الرياضة هتساعد بشكل كبير لأنها بتساهم في التنفيس عن المشاعر السلبية، كمان إنك تكتب  أو تحسب إنت بتاكل إيه وتبدأ تراقب نفسك وتحاول تبعد المغريات من الأكل عن متناول إيدك
كل دي حاجات هتساعدك في التغلب على الجوع العاطفي.. وإنك تلاقي مجال تاني للتعبير عن مشاعرك غير الأكل!

Comments: