٧ نصايح للحفاظ على شعرك "الكيرلي" في فترة تغيير الفصول!

15/10/2020

في فترة تغيير الفصول كلنا بنعاني مع مشاكل شعرنا من تقصف أو تساقط وغيرها.. اللي شعرهم كيرلي بيعانوا أكتر لأن الاهتمام بالشعر الكيرلي بيتطلب مجهود وخطوات أكتر.. وبيعاني من الجفاف والهيشان أكترر من باقي أنواع الشعر

هنقولك 7 نصايح تقدري تحافظي على شعرك الكيرلي خلال الفترة دي ويبقى شكله صحي وتحميه من الجفاف والهيشان

1- طبيعة الشعر الكيرلي عمومًا بتخليه معرض للجفاف أكتر من باقي أنواع الشعر، وده بيزيد أكتر مع تغيير الفصول
بالتالي لازم تحافظي على ترطيبه طول الوقت من خلال استخدام الزيوت زي (الجوجوبا، الأرجان، جوز الهند، زيت الزيتون) خاصة على أطراف الشعر
وممكن تعملي حمام زيت مرة في الإسبوع

2- تنشيف الشعر بفوطة بعد غسله بيتسبب في إنه يهيش أكتر، فممكن تستخدمي الفوطة "المايكرو فايبر" المخصصة للشعر، ولو مش متاحة تقدري تستخدمي أي تيشيرت قطن عشان يحافظ على ترطيب شعرك

3- أوعي تستخدمي الفرشاة لتسريح شعرك.. لأنها هتقطعه وتسبب في تقصيفه، استخدمي مشط ويكون سنونه واسعة وسرحي شعرك وهو مبلول بس 

4- استخدام ماسكات للحفاظ على ترطيبه زي ماسك الألوفيرا أو "جل الصبار".. من خلال خلط كمية من الجل مع كوبايتين ميه وتحطيهم على الشعر وفروة الرأس بعد غسل وتنشيف الشعر
جل الصبار بيحتوي على بروتينات بتساعد في تنعيم الشعر وفيتامينات ومعادن زي الزنك والحديد بتغذي وتحافظ على صحة الشعر، أو ماسك "اللبن والعسل" من خلال خلط كوباية لبن دافية مع معلقتين عسل كبار ونسيبهم ساعة على الشعر بعد كده نغسله بالشامبو، الماسكات دي غير إنها بتغذي شعرك فهي بتحافظ على الكيلز بتاعته وبتخلي شكله صحي أكتر

5- البعد عن الحرارة.. ولو هتضطري تستخدمي الحرارة على شعرك يبقى تدوري على منتجات تعمل طبقة عازلة بين الشعر والحراراة عشان تقلل الضرر على شعرك وحاولي تستخدمي درجات حراراة قليلة

6- تغيير أكياس المخدات القطن بساتان أو حرير، لأن أكياس المخدات القطن بتمتص الزيوت الطبيعية اللي بيفرزها شعرك خلال النوم لترطيبه، لو مش هتقدري تعملي ده ممكن تربطي شعرك خلال النوم بإيشارب من الحرير أو الساتان

7- أهم من كل ده الحفاظ على نظام أكل صحي يبقى فيه الفيتامينات اللي شعرك محتاجها وشرب ما لايقل عن 2 لتر ميه في اليوم لأن ده بينعكس على صحة شعرك.

 

Comments: