ابعد عن التنشنة والسخافة..  واعرف 7 فوايد للجوافة!

21/10/2020

في ظل زحمة التريندات والخناقات والصراعات اللي مالية السوشيال ميديا كلها في جميع الإتجاهات وفي كل المواضيع كتبنالك الموضوع ده.. وهو له هدفين أولًا إنك تفصل من كل الحوارات دي.. وثانيًا أكيد إنك تعرف فوايد الجوافة برضه بما إننا في الموسم بتاعها

الجوافة مهدور حقها مع إن فوايدها أكتر من فاكهة كتير واخدة صيت وجو عنها، فاعتبر ده موضوع لنصرة الجوافة اللي ناس كتير مش بتديها حقها وبيجيبوا سيرتها بس لما بيقولوا الجو ريحته جوافة، ورقة وقلم بقى واكتبي الفوايد يا ست الكل

الفايدة الأولى:

الجوافة غنية بفيتامين "سي" وبتحتوي على ما يعادل 4 أضعاف نسبته في البرتقال، ونسبة فيتامين "سي" اللي في الجوافة هي ضعف النسبة الوصي بتناولها خلال اليوم، وإحنا داخلين على الشتاء، وموجة تانية من الكورونا، فإحنا في عرض أي فيتامين "سي"

الفايدة التانية:

مصدرٌ جيدٌ لفيتامين "أ"  اللي يعتبر من أهم الفتامينات لصحة العيون، وصحة الجلد، وكمان مصدر جيد للبوتاسيوم واللي يعتبر مهم لصحة العضلات وتوازن مستويات السوائل جوه الجسم

الفايدة التالتة:

المساعدة في خسارة الوزن، لأنها بتحتوي على نسبة كبيرة من المياه والألياف، وكمان سعراتها الحرارية قليلة
فثمرة واحدة بتحتوي على حوالي 37 سعر فقط، عشان كده هي مناسبة جدًا للناس اللي بتعمل ريجيم

الفايدة الرابعة:

المساعدة في التحكم في مستويات السكر في الدم لأنها بتساعد في خفض نسبته في الدم بالذات لمرضى السكر ، وكمان بتساعد مرضى ارتفاع ضغط الدم من خلال تقليل نسبة الكوليسترول في الدم

الفايدة الخامسة:
ورق الجوافة له فوايد كتير منها علاج الكحة من خلال غليه مع ماء وشربه، وكمان بيساعد في الحفاظ على صحة الأسنان وعلاج حالات التهاب اللثة

الفايدة السادسة:
تقليل آلام الدورة الشهرية، وفي دراسةٌ اتنشرت في مجلة Journal of Ethnopharmacology سنة 2007، ظهر فيها أنَّ استخدام مُستخلص من الجوافة، ساعد في تخفيف آلام الدورة الشهرية أكتر من العلاجات والطرق التقليدية بشكل ملحوظ

الفايدة السابعة:

طرد السموم من الجسم، والتخلص من آثار البكتيريا الضارة في المعدة والأمعاء والجهاز الهضمي عمومًا، لأن ليها خصائص مطهرة بسبب احتوائها على فيتامين "سي" والبوتاسيوم

بعد ما عرفت الفوايد دي تقدر تنزل تجيبلك 2 كيلو جوافة، وتشوف لو تحب تفصل برضه أو ترجع تاني  للنتنشة والسخافة، إنت حر!

Comments: