٤ فوايد هتعود عليك لما تعمل "Checklists" وتستخدمها: بتوفر الوقت والمجهود الذهني

28/10/2020

الناس طبعهم مختلف فيه منهم اللي بيحب النظام ويمشي على كل حاجة بالورقة والقلم، وفيه اللي بيحب يعيش الحياة بعشوائية ومايقدرش يحسبها، بس لو إنت تبع النوع اللي بيحب النظام والورقة والقلم هتلاقي حياتك فيها أكيد أي نوع من أنواع الـ "Checklists" أو هتبقى عملتها واستخدمتها مرة على الأقل، زي مثلا "Checklists" ليومك هيمشي إزاي، أو لفرحك، أو لحاجات عايزها في سفرية، أو لحاجات نازل تشريها من السوبر ماركت.

بس لو إنت من الأشخاص اللي مابتستخدمش الـ "Checklists" في حياتها خلينا نقولك إنك مضيع على نفسك مميزات كتير ممكن تكسبها من الـ "Checklists".. وبما إن يوم 30 أكتوبر هو يوم الـ "Checklists" اعرف إيه هي مميزاتها وفوايدها حسب ما قال موقع "maplemoney":

1- استخدام الـ "Checklists" هيسمحلك تحقق حاجات أكتر:

الأبحاث بتقول إن الشخص بيحصل على اندفاع الـ"الاندورفين" كل ما يشطب على حاجة حققها في الـ "Checklists"، فلو كنت استخدمتها قبل كده فأكيد إنت عارف الإحساس اللي بتحسه لما بتنجز مهمة كنت كاتبها وبعد ما تخلصها تعمل صح جنبها أو تشطب عليها، ويمكن عشان الإحساس الحلو اللي الشخص بيحبه هي أصلا مفيدة لإنها بتشجع الشخص على إنجاز حاجات أكتر من اللي كاتبها.

2- بتوفر الوقت والمجهود الذهني:

بدل ما تقضي أوقات كتير من يومك بتفكر هو المفروض تعمل إيه النهاردة أو المفروض تاخد إيه وتبقى بتلف حوالين نفسك وتقعد تسأل اللي معاك، فالـ "Checklists" من أهم فوايدها إنها بتفكرك باللي هتعمله أو هتاخده، وممكن تستخدم الـ "Notes" في موبايلك أو في الكمبيوتر بتاعك إنك تكتب فيها الـ "Checklists" بتاعتك، وطبعا غير الوقت اللي هتوفره برضه هتوفر كمان مجهودك الذهني.

3- بتخلي التفاوض أحسن:

لما بيكون عندك "Checklists" لحاجات المفروض تتعمل أو تتجمع فإنت لو ماقدرتش تخلصها بتخلي شخص تاني على الأقل يساعدك في إنه يخلصها، سواء كنت بتطلب من الشخص إنه ينفذ حاجة منها أو ينفذها كلها، فاللي قدامه هيكون واضح ومنظم وهيسهل عليه إنه يقتنع.

4- هتوصل لأهدافك بشكل أسهل بكتير:

لو عامل "Checklists" لخطط طويلة المدى فدي هتساعدك في تحدد أهدافك لنفسك وهيساعد إن يبقى فيه قايمة موجودة في حياتك إنك توصل لأهدافك بشكل أسهل، وده عن طريق إنك بتقسم أهدافك اللكبيرة دي على أيام فهتبقى أكتر منطقية وقابلية للتحقيق، فمثلا لو كان هدفك إن تخس 20 كيلو في 4 شهور هتبقى عارف في كل شهر لازم تخس قد إيه وبالتالي كل أسبوع لازم تخس قد إيه وعلى أساسهم بتمارس تفاصيل صغيرة في يومك بأهداف قصيرة المدى عشان توصلك لأهدافك طويلة المدى.

أحسن حاجة بتتعمل في "Checklists" إنها سهلة وبتتكتب بسرعة وفي نفس الوقت ليها فايدة أكتر من كونها جمل أو كلمات بتتكتب تحت بعض، ومن الأحسن إنك تعملها قبل ما تنام كل يوم لليوم اللي بعده لإن أثناء النوم عقلك بتهيأ إنه يشتغل على المهام دي اليوم اللي بعده، لكن اتأكد إنك مابتكتبش حاجة فوق طاقتك أو حاجات مش هتقدر تنفذها فمثلا مجموع المهام اللي هتبقى فيها 7، عشان ماتحسش بانهزام قبل ما تبدأ فيها أصلا.



 

Comments: