٧ حاجات.. بتقولك قوم يلا قدم استقالتك من الشغل!

28/10/2020

ساعات دوامة الشغل والروتين بتاعه بيسحلنا لدرجة إننا مبنلحقش ناخد وقفة مع نفسنا ونشوف هل احنا في المكان المناسب لينا فعلًا ولا الشغل بالنسبالنا بقى مجرد جزء من روتين اليوم.. لكن لا بيضيف لينا ولا بنضيف ليه أي قيمة 

جمعنالك  7 حاجات أو علامات لو لقيتهم موجودين عندك يبقى انت محتاج تقف وقفة مع نفسك وتبدأ تشوف شغل تاني 

1- إنت بتشتغل الشغلانة ليه من الأول ؟

لو لقيت إن السبب اللي خلاك تبدأ في الشغل ده ما زال موجود يبقى لسه في سبب  أو دافع لاستمرارك، إنما لو لقيت نفسك بطل تبقى متحمس للشغل زي ما كنت في الأول، ولا بقيت بتحب تروح المكان وبقى الموضوع كله تقضية واجب أو وسيلة تجيب بيها فلوس وبس يبقى محتاج تراجع نفسك

2- حجم الضغط:

طبيعي أي شغل في الدنيا بيكون فيه ضغط، بس لو الضغط ده مستمر لفترة طويلة واتكلمت مع مديرك وزمايلك وماحصلش أي تغيير ،وإنت شايف إن في حلول أو خطوات ممكن تتنفذ لكن ده مابيحصلش، وده بييجي على صحتك النفسية والجسمانية دي كمان علامة من علامات الخطر

3- مبتاخدش حقك:

وحقك ده مش بس المرتب أو المقابل المادي، بس كمان إن شغلك ومجهودك يتشاف ويتم تقديره، وتُكافيء عليه
لأن ده حقك إنت مش بتعمل عمل تطوعي، إنت بتدفع جزء من طاقتك وذهنك ووقتك وصحتك، في مقابل ده لازم تحصل على التقدير المادي والمعنوي المناسب والكافي ليك

4- بيئة الشغل Toxic:

وده بيحصل لما تكون الصراعات والمشاكل  بين الناس  في مكان الشغل، بتاخد حيز أكبر من الشغل نفسه، ودايما في شلل أو فرق وإنت مطالب تبقى منتمي لشلة منهم عشان تقدر تشتغل، مهما حاولت تبقى شخص محايد غصب عنك هتضطر تاخد موقف في الآخر وده هيخليك تتحول لجزء من الصراع ده وهيأثر على شغلك وعليك إنت شخصياً بشكل سلبي

5- شكل حياتك اتغير:

طبيعي شكل حياتنا بيتغير مع الوقت، يعني عدد ساعات شغلك مثلاً قبل الجواز هيختلف عن بعده أو لو غيرت مكان سكنك لمكان بعيد عن الشغل، أو ظروفك الصحية اتغيرت أو أي تغيير كبيرفي حياتك الشخصية، هيبقى متعارض أو ممكن يأثر على أدائك في الشغل، أو على حياتك بشكل سلبي يبقى محتاج تبدأ تدور على مكان تاني يناسب التغيير في ظروفك

6- فرصة ماتتعوضش:

إنك يجيلك فرصة أو عرض شغل أحسن من اللي إنت موجود فيه، وتقدر تحكم على ده من خلال اسم المكان والتايتل بتاعك، وهتشتغل مع مين والمرتب والتأمينات وكل حاجة متعلقة بالشغل نفسه، لو كل الحاجات دي موجودة في الفرصة اللي اتوفرت ليك يبقى محتاج تمشي

7- مهاراتك زي ما هي:

جزء من الأسباب اللي بنشتغل عشانها هي إننا نطور المهارات اللي موجودة عندنا وننميها، أو نكتسب مهارات جديدة، لو ده مبقاش بيحصل، أو إن شغلك مش بيدي فرصة لمهاراتك دي إنها تتطور أو حتى تظهر يبقى الشغل مبقاش مناسب ليك ومش هيضيف ليك

حاول تاخد بريك 10 دقايق كده وتقرا الموضوع ده بهدوء،  وتشوف إيه من الحاجات دي إنت حاسس بيها في شغلك، ولو لقيت أكتر من حاجة يبقى إنت محتاج تشوف مكان تاني،  وصحيح هي جملة كليشيه بس إنت فعلا مششجرة وممكن تتحرك وماتخليش الكومفورت زون تبلعك لمجرد خوفك من التغيير والحركة، والتجربة عمومًا  مش هتموتك بس الروتين ممكن !

Comments: