القصة الكاملة لطفل المعادي نجل القاضي 

02/11/2020

انتشر فيديو الفترة اللي فاتت لطفل صغير سنة مايتعداش 14 سنة كان بيسوق عربية مرسيدس في  المعادي ولما وقفه رجل شرطة اتنمر عليه هو وأصحابه وفي الآخر سابه وجري بالعربية، وبعدها تم الوصول لصاحب الفيديو وأمر النائب العام بالتحقيق في واقعة تعدي الطفل على فرد شرطة مرور.

وحققت نيابة الطفل مع الطفل اللي ظهر في الفيديو، وتبين إن الطفل ابن قاضي وكان بيسوق العربية في المعادي، وقررت النيابة العامة إخلاء سبيل مالك العربية بكفالة 10 آلاف جنيه على ذمة التحقيقات، وصاحب العربية هو صديق والد الطفل، والتزمت النيابة بعدم حبس الطفل احتياطياً لإن سنة 13 سنة وماتجاوزش الـ 15 سنة، وأوصى الإخصائي الاجتماعي بتسليم الطفل المتهم لولي أمره والتعهد بالمحافظة عليه وحسن رعايته وإخضاعه للتأهيل وجلسات تعديل السلوك وده بناءاً على المادة 119 من قانون الطفل.

وقال الطفل في حوار صحفي له إن اللي حصل إن صديق والده هو صديقه من زمان وبيروح له كتير، وماكنش عايز يديله العربية، وهو نازل من عنده لقى مفتاح العربية جنب الباب ونزل خد بيها لفة، وإن صديق والده ساكن جنب الميدان بـ 200 متر، وأثناء ما كان سايق العربية أمين الشرطة خبط المراية بتاعت العربية، فلف له عشان ياخد المرايا، وحد من أصحابه صوره وبعت الفيديو لأصحابه وانتشر الفيديو على السوشيال ميديا.

وبعد إخلاء سبيل الطفل وصاحب العربية بكفالة امبارح الأحد 1 نوفمبر، أمرت النيابة العامة النهاردة الصبح الاثنين 2 نوفمبر بالتحقيق تاني في الطفل ابن القاضي صاحب الفيديو هو و4 من صحابه بسبب فيديو تنمر جديد، اللي ظهر فيه الطفل "لايف" على انستجرام بعد إخلاء سبيله وبعد تسليمه لأسرته هو و4 من أصحابه وهما بيتلفظوا في الفيديو بشتايم كتير وألفاظ غير لائقة وسب للمتابعين، وقال الطفل "سجن إحنا مابنتسجنش".

وقالت مصادر قضائية إن وزارة العدل أمرت باستدعاء المستشار والد الطفل صاحب الواقعة "أبوالمجد عبدالرحمن أبو المجد" رئيس محكمة جنح مستأنف في الإسماعيلية والمعروف باسم والد طفل المرور للتحقيق معاه في الوقائع المنسوبة لابنه بعد القبض عليه مرة تانية.

وقررت جهات التحقيق اليوم إيداع الطفل و4 من أصدقائه في مقر دار رعاية الأطفال لحين ورود تحريات المباحث، وعلى الجانب الآخر كرم وزير الداخلية أمين الشرطة بطل الواقعة.

Comments: