الترند بيقول إيه؟ | ما بين خسارة مرتضى منصور وأرقام كورونا ونهائي القرن.. نشهد احتفاء بدخول الشتاء

10/11/2020

كتب: محمد إنسان
عزيزي القارىء أهلًا بيك..
هناخد مع بعض جولة على السوشيال ميديا ونشوف الناس بتتكلم على إيه.. وإيه اللي شاغل الرأي العام.. أو لو قولناها بالمصطلح الحديث هنقول.. "الترند بيقول إيه؟"


*انتخابات مجلس النواب.. والفرحة بخسارة مرتضى منصور*

من إمبارح للنهاردة المشهد المسيطر على كل وسائل الإعلام في مصر هو مشهد الانتخابات البرلمانية.. ولو أنت حتى مالكش في الانتخابات أوي أو حتى مش متابع "بصوت باسم مرسي".. أكيد عدى عليك خبر خسارة مرتضى منصور للانتخابات وخسارته للحصانة البرلمانية اللي كانت بتحميه من أي بلاغ بيتقدم ضده.. خسارة مرتضى منصور اتحولت لترند كبير ع السوشيال ميديا خصوصا على تويتر اللي ظهر عليه هشتاج قوي جدًا بإسم #مرتضى_سقط_يارجالة ..


*رئيس أمريكا الجديد.. وكوميديا ترامب*

خلال الأسبوع اللي فات ولحد وقت قريب.. الرأي العام المصري وفي ظاهرة عجيبة وغريبة جدًا، كان مهتم بنتايج الانتخابات الأمريكية بشكل كبير.. مش بس كده الموضوع وصل إن ناس كتير جدًا كانت بتحلل الموقف لكل مرشح وانقسموا لأحزاب بتأيد ترامب أو بايدن.. ولكن بعد ظهور نتيجة الانتخابات اللي فاز بيها بايدن اتصدر المشهد تيار السخرية من ترامب ومن ردود أفعاله وتشكيكه في نتيجة الانتخابات والتويتات اللي كان بيكتبها.. والموضوع اتحول لكوميكس وميمز والقعدة صغرت جدًا.

*أرقام كورونا وتوابع مهرجان الجونة السينمائي*

في الفترة الأخيرة بدأت أرقام إصابات فيروس كورونا في مصر ترتفع من تاني "حسب بيانات وزارة الصحة" وده أدى لقلق كبير لرواد السوشيال ميديا خصوصا بعد الإصابات اللي ضربت عدد كبير من المشاهير بعد تواجدهم في مهرجان الجونة السينمائي.. وتصريحات وزيرة الصحة المصرية اللي طالبت فيها بتخفيض العمالة للنصف في الشركات والهيئات واللي أكدت فيها إن الفترة الجاية هتشهد ارتفاع ملحوظ في عدد إصابات ووفيات فيروس كورونا.

*نهائي القرن بين الأهلي والزمالك وأزمة الاستاد*

الشارع المصري يترقب مباراة ماحصلتش في التاريخ الكروي المصري قبل كده.. وهي مباراة الأهلي والزمالك في نهائي دوري أبطال أفريقيا أو كما يقال عليه "نهائي القرن" واللي اتحدد ميعاده يوم 27 نوفمبر وهيكون على ملعب برج العرب بالإسكندرية.. وبالمناسبة خبراء الأرصاد أكدوا إن الفترة دي من الممكن إنها تشهد أمطار وسوء في الأحوال الجوية.. وده اللي خلي عدد كبير من جماهير الفريقين يطالب بنقلها لملعب القاهرة الدولي.. وطلع إمبارح وزير الشباب والرياضة في تصريح أكد إنه هيتم نقل المباراة لإستاد القاهرة "إن شاء الله" على حد قوله.


*دخول الشتا وخناقة كل سنة*

الجو بدأ يسقع والقاهرة أخيرًا شهدت أمطار غزيرة وبداية لطيفة لدخول الشتاء.. وطبعًا وكالعادة السوشيال ميديا اتقسمت لطرفين.. طرف بيحب الشتاء ومبسوط بالجو وبيصور المطر وبيرقص تحتيه.. وطرف تاني مضايق وبيقول الجو طينة وفرحانين على إيه.. ودي خناقة كل سنة اللي بتقلب بكوميكس وميمز وساعات بتوصل لخناقات وتعصب في الرأي.

 

Comments: