٨ عادات غريبة بسبب اختلاف الثقافات ممكن تسببلك إحراج

10/11/2020

بالرغم إن كلنا عايشين على نفس الكوكب وكلنا بشر إلا إن هتلاقي الحدود والقارات والمسافات بيبان تأثيرها علينا، خصوصا لو سافرت أو احتكيت بناس من بلاد مختلفة هتعرف كويس إن كل بلد زي ما ليها لغة ليها العادات والتقاليد بتاعتها والثقافة الخاصة بأهلها، ويمكن كمان جوا البلد الواحدة الثقافة والعادات بتختلف.

الاختلاف اللي بين البلاد والثقافات ده اللي بيعمل صدمة حضارية أو "Culture Shock" ولكن بعدها الواحد بيقدر يفهم الاختلاف ويتأقلم، بس خلينا نقولك نبذة عن الاختلافات اللي ممكن تلحقك من الاحراج لو قررت تسافر وفقاً للي قاله موقع "Bright side" في إحدى مقالاته:

1- تاكل بايديك في "تشيلي":

في تشيلي ماينفعش تلمس الأكل بايدك، حتى لو كانت وجبة بسيطة في نص الأكلات أو "سناكس" زي البطاطس المحمرة مثلا، لازم تاكلها بالشوكة أو المعلقة، وعشان كده عندهم الشوكة والسكينة جاهزين لأي وجبة في اليوم.

2- تأكل قبل أكبر واحد على السفرة ما يأكل في كوريا:

احترام الكبار في الثقافة الكورية حاجة مهمة جدا، وده اللي بيخليهم يستنوا وماياكلوش قبل ما أكبر شخص في السن ياكل الأول، ولازم برضه تفضل قاعد على الأكل لحد ما أكبر شخص يقوم من على الأكل، ده غير كمان إن لو فيه حد أكبر منك في السن قدملك مشروب لازم ترفع إيديك الأتنين بالمشروب عشان تشكره.

3- تقلب سمكة في الطبق في الصين:

من عادة الصينين إنهم يحطوا سمكة واحدة في طبق كوجبة، لكن خليك عارف إن في بعض الأماكن في البلد بيعتبروا إنك لو قلبت السمكة ده دليل على الحظ السئ، لإنه بيدل على إن فيه قارب صيد هيتقلب.

4- تطلب جبنة زيادة على البيتزا في إيطاليا:

إيطاليا مشهورة بأكلات المعجنات، لكن بيعتبروا إنها وقاحة إنك تطلب إضافة على الطبق اللي عايزة لو ماكنتش موجودة أصلا في الطلب، يعني لو عايزة جبنة بارميزان على البيتزا هيشوفوا دي وقاحة لإنك بتضايق الناس اللي بيشتغلوا كده.

5- تدخل بيت بالجزمة في اليابان:

من عادات اليابانيين وهما داخلين البيت إنهم يقلعوا الجزمة قبل ما يدخلوا البيت عشان يحافظوا على البيت نضيف من الطين أو التراب اللي بيبقى داخل في الجزم، خصوصا لإن التقليد ده من زمان وهما زمان كانوا بيفرشوا على الأرض حصير من القش وبياكلوا وبيناموا عليها فكانوا بيقلعوا الجزم قبل ما يدخلوا البيت.

6- تأكل كل الأكل اللي في طبقك في الصين:

في الصين بيعتبروا إنك لما تخلص طبقك للأخر دي حاجة قليلة الأدب وإنها إشارة على إن الناس اللي بتاكل عندهم ماقدملكش أكل كفاية، لكن العادة دي اتغيرت مع حملات التوعية بإهدار الأكل.

7- ماتخلصش طبق الأكل بتاعك في الهند:

على عكس كل اللي قولناه في الصين، في الهند بقى لو سبت أي أكل في طبقك وإنت قايم ده يعتبر عدم احترام للأكل اللي بيعتبر شئ مقدس، فلازم تخلص طبقك للأخر.

8- تكتب اسم حد باللون الأحمر في كوريا الجنوبية:

في كوريا الجنوبية بيعتبروا اللون الأحمر هو إشارة على الموت، عشان كده بيعتبروا إن كتابة اسم شخص باللون الأحمر هو دليل على إنه مات، فمن المعتقدات عندهم إنك لو كتبت اسم شخص باللون الأحمر ده هيجيبه حظ سئ، وعشان كده اتأكد دايما لو سافرت كوريا الجنوبية إن معاك قلم أسود أو أزرق أو رصاص حتى.

خلى بالك إن كل محافظة حتى ليها عاداتها وتقاليدها وحاول لما تسافر أي مكان جوا أو برا مصر إنك تحافظ على تقاليد الناس وتحترم ثقافتهم، عشان كده اسأل قبل ما تسافر أي مكان لو كان فيه بين ثقافاتكوا اختلاف واعرف الاختلافات بالظبط عشان تتلاشى أي مواقف محرجة ليك وليهم.

Comments: