غير التمثيل.. جانب آخر محتاج تعرفه عن "ليوناردو"!

10/11/2020

وات أباوت يور فيرست أوسكارز؟

يمكن دي علامتنا وتاتشنا المصري مع "ليوناردو دي كابريو".. بس بعيدًا عن التمثيل المشرف ده

أعتقد إن من وقت فيلم تيتانيك، وقصة حب جاك وروز والخشبة اللي روز خدتها لنفسها وسابت جاك يموت، وإحنا كمصريين معتبرين إن ليوناردو ده شخص مظلوم، ولأننا شعب عاطفي بطابعه، فالشعور ده كان بيتضخم بعدد كل دور عبقري ليه بيبقى متوقعله ياخد الأوسكار ومابيحصلش، وتم ترشيحه للأوسكار 7 مرات آخرهم كانت السنادي عن فيلم "Once Upon a Time in Hollywood"

والمرة الوحيدة اللي حصل فيها على الأوسكار كانت سنة 2016 عن فيلم The Revenant،  وأبرز الترشيحات قبلها كانت عن فيلم The Aviator سنة 2005، وسنة 2014 عن فيلم The Wolf Of Wall Street

بصراحة احنا في المقال ده مش جايين نتكلم عن تاريخ ليوناردو ولا نقيم أعماله اللي كل الدنيا عارفاها ، دي بس كانت مجرد مقدمة عشان ندخل في موضوع أعمق وأكثر تشويقًا، 
الستات في حياة ليوناردو، لأ مش زي ما فهمت أكيد

إحنا بنتكلم عن دور المرأة وتأثيرها في حياته، بداية من والدته 


اللي بتظهر معاه في مهرجانات وفعاليات كتير من بداية ظهوره، ومرة صرح إنه لما بيشوف أي صورة ليها بيدمع لأنه عارف هي مرت بإيه خلال حياتها، ووالدته انفصلت عن والده وهو ماكملش سنة وهو عاش معاها، ووصف ليوناردو والدته في حوار ليه للتلجراف إنها "معجزة متحركة" وأثناء تسلمه جايزة  Batfta لأفضل ممثل سنة 2016 بدأ خطابه بأنه قال "لولا والدته عمره ما كان هيبقى الشخص الموجود قدامنا ده"

لأنها كانت بتسوق 3 ساعات مرتين في اليوم عشان تقدر توديه لمدرسة كويسة وتوفرله فرص تعليم وحياة أفضل، لأنه كان ساكن في حي فقير

 

الصداقة، ولما بنقول كده على طول معناه إننا بنتكلم عن الممثلة "كيت وينسلت" أو "روز" حبيبة "جاك" في تيتانيك، والحقيقة إن صداقتهم بدأت من بداية عملهم في الفيلم واستمرت لحد دلوقتي وكان فيها محطات مهمة زي وفاة والدة "كيت" بسبب السرطان قالت إن وجود "ليوناردو" ودعمه لها في الفترة دي أنقذها من اليأس

و هي كانت حاضرة معاه في معظم لحظاته المهمة اللي من أهمها لحظة فوزه بالأوسكار سنة 2016 ، ودايمًا بتصرح وتقول "إحنا أكتر من أصدقاء.. وإنه من أهم الناس في حياتها"

 

بس بالنسبة لعلاقاته العاطفية فالموضوع مختلف تمامًا، لأنه على مدار السنين إرتبط كتير جدًا ومعظم علاقاته مكانتش بتستمر لفترات طويلة ماعدا علاقتين بس لكن كمان انتهوا بالإنفصال، وعمر العلاقة ما وصلت لخطوة  الزواج أبدًا، بس حاليًا في أخبار وتوقعات كتير إنه بينوي الزواج من صديقته "كاميلا مونرو"  واللي مرتبط بيها من سنة 2017، وصرحت والدته في شهر يوليو إنهم استغلوا فترة الحجر الصحي بسبب كورونا في توطيد علاقتهم أكتر.. فها نسأل الله التساهيل



ومن مكاننا هنا بنقولهم مقدمًا إن شاء الله وألف ألف مبروك.. وكل سنة وإنت طيب يا ليو بمناسبة عيد ميلادك!
 

Comments: