إحنا ليه بنام طول اليوم وبنصحصح في نهايته؟

11/11/2020

كتب: محمود عادل

أكيد في أيام عدت علينا كلنا، بنكون عايزين ننام جدا طول اليوم ولما بنوصل للسرير فجأة مخك يا حول الله بقى دلوقتي مش عايز ينام وأنت مصحصح تماما.. طب ليه؟

الموضوع كبير جدا وميتشرحش في موضوع واحد، ولكن هنحاول نلم الأسباب والحلول.

أستاذ مساعد في الطب النفسي اسمه "فيليب جيرمان" قال -حسب موقع TIME- إن المشكلة دي منتشرة جدا، وده بسبب إن في حاجة غلط في بيئة نومك حصلت، بالبلدي كدة برمجة مخك إن السرير مكان للصحيان مش للنوم.. إزاي؟

دكتورة مويرا جونج، أخصائية علم النفس في مؤسسة صحة النوم الأسترالية قالت -حسب موقع Nine- الأسترالي إن التفكير في المشاكل وقت النوم بيعمل مشكلة دي وبالتالي مخك بيتبرمج إن السرير هتفضل صاحي تفكر في مشاكلك لإن ده الوقت الوحيد اللي دماغك فضيت فيه من زحمة اليوم.

دكتورة سنام حفيظ، أخصائية علم النفس العصبي في جامعة كولومبيا قالت في موقع insider إنها بتنصح بالتخلص من قيلولة النهار أو زي ما بنقول عليها "هقيل شوية"، يعني أفضل ماسك نفسك ومتنمش في نص اليوم تماما!

والدكتورة حفيظ قالت بردو إن لو شغلك ممل ومش بتبذل فيه أي مجهود، بيخلي جسمك يفضل صاحي ومركز لإن فعليا معملتش أي نشاط محتاج طاقة طول اليوم، فا الطاقة دي بتروح معاك من الشغل للسرير والحل ده إنك تتمشى أو تلعب رياضة اللي هتخلي جسمك يخرج الطاقة فتروح البيت عايز تنام بس إوعى تعملوا قبل النوم بـ3 ساعات عشان غالبا هيثير جسمك فا مش هتنام وده حسب كلام جويس إيانوتي، مديرة مركز اضطرابات النوم في جامعة بانر لموقع insider

تقريبا كدة فصصنا المشاكل كلها.. طيب إيه الحل؟ الحلول دي نتمنى إنها تساعدك بشكل كويس على نوم هادئ وجميل

1- خلي السرير مكان النوم، يعني لا تأكل فيه ولا تشتغل منه ولا تشوف السوشيال ميديا ولا تشوف فيلم أو مسلسل أو متقعدش تماما قدام شاشات لإنهم بيصدروا حاجة اسمها "موجات زرقاء" ودي بتقلل إنتاج هرمون "الميلاتونين" اللي بيساعد دماغك على النوم، ولذلك الحجة لما قالتلك كله من الزفت اللي في إيدك ده يبقى مكدبتشز

2- اعمل روتين يومي بليل زي اللي كان بيتعملك وأنت صغير، لما كان باباك وماماتك يقولولك قوم اتعشى واغسل سنانك وتعالى احكيلك حدوتة النوم، ده الروتين اللي بتقول بيه لنفسك إنك في طريقك للنوم.

3- قول لنفسك أنا كنت نعسان من شوية وأكيد هنعس تاني وأنام، متحطش فكرة إنك فوقت ولو منمتش خلال 20 دقيقة قوم اعمل أي حاجة ومترجعش السرير غير وأنت عايز تنام فعلا جدا أوي!

4- لو معرفتش تنام حاول تشوف أوضة تانية تنام فيها، ده هيساعدك بشكل كويس.

5- قلل الكافيين بشكل عام

6- ثبت مواعيد معينة للنوم والصحيان، يعني هتنام مثلا 12 يبقى هتصحى 8 كل يوم، حتى لو موركش حاجة أو في الويك إند لإنك لو أديتها نوم في الإجازة، هتبوظ كل حاجة وترجع تعيد كل أسبوع

Comments: