الصين أطلقت أول قمر صناعي للجيل السادس في العالم 

11/11/2020

لحد دلوقتي فيه دول كتير بتحاول تدخل الـ 5G بس الصين دخلت المرحلة دي وعدتها وراحت مرحلة تانية بعدها وأطلقوا قمر صناعي بيقولوا إنه أول قمر صناعي للـ 6G في العالم، وقالوا إن القمر الصناعي اللي من المتوقع استخدامه لاختبار جديد هيوفر سرعات من الجيل السادس في النهاية، وتم إطلاقه من مركز تايوان لإطلاق الأقمار الصناعية في مقاطعة شانشي يوم الجمعة 6 نوفمبر 2020.

وأعلنت الحكومة الصينية إن البحث في الـ 6G بدأ وبعد أيام من انطلاق الجيل الخامس في البلد، ولسه الشبكة المستقبلية بعيدة شويه عن إنها تبقى حقيقة واقعية، ويمكن تبقى الخطة اللي الصين حطاها هتحقق في 2030، وأغلب المهندسين قالوا إنها ممكن تبقي في أسرع 100 مرة من التوصيلات الحالية.

ومن المتوقع إن الصين تختبر موجات " تيراهيرتز" عالية التردد اللي بتشكل أساس الشبكة، وقال الخبراء إن موجة الـ" تيراهيرتز" بالاضافة للذكاء الاصطناعي هتساعد في بناء اتصال قادر على توفير سرعات عالية بسعة أكبر أكر من اللي في الجيل الخامس اللي بتنتشر حاليا في كل العالم.

وبالنسبة لموجات " تيراهيرتز" فهي بتنقل البيانات بسرعة 50 جيجابايت في الثانية تقريبا مع قدرة الشبكة اللاسلكية على الوصول للسرعة القصوى اللي سرعتها حوالي 500 ميجا بايت.

ووفقاً لمحطة CCTV الصينية قال "شو يانغ شنغ" مهندس في الأكاديمية الصينية للهندسة " إن شبكة 6G هو عبارة عن دمج بين شبكة اتصالات الأقمار الصناعية وشبكة الاتصالات الأرضية، وبيمثل القمر الصناعي التجريبي المرة الأولى اللي هيتم التحقق فيها من تقنية اتصالات "تيراهيرتز" في تطبيقها في الفضاء.

القمر الصناعي التجريبي اللي أطلقته الصين لبداية رحلته الجيل السادس تم تسميته على اسم جامعة العلوم والتكنولوجيا الإلكترونية في الصين، ووزنه حوالي 70 كيلو وتم إطلاقه مع 12 قمر صناعي تاني ومن ضمن التفاصيل اللي فيه إن فيه معدات بيتم استخدامها لمراقبة المحاصيل والوقاية من حرايق غابات الصين.

Comments: